Shillong, Jylliew 17 : Ka Khasi Students Union (KSU)-Western Border Area ryngkat ka KSU Umrit Unit, ha ka sngi Ba-ar, kala kynmaw burom ia u dkhot (L) Paul Biswal Makri, u samla uba kyllon iap ha ki ktang suloi ki CRPF ha ka jingiakhih ka KSU ha Shillong, ha u snem 1987.
Ka KSU kala kynmaw burom ia ka jingdap 38 snem jong une u dkhot naduh ba ula khlad na kane ka pyrthei. U samla Paul Biswal Makri u dei na ka shnong Umrit na Western Ri-Bhoi bad la kha ia u ha u snem 1971.
Ka KSU hapoh ka jingialam u President Bah Bull N Lyngdoh, kala pynlong iaka jingiakhih kaba jur ha Shillong ha u snem 1987 ban iakhun pyrshah ia ka jingthombor ki bar jylla ia ki samla Khasi, knieh ia ki jaka puta bad iuhroit ia ka longryngieng ki kynthei bad dei ha kane ka jingiakhih ba u samla Paul Makri ula kyllon iap ha ki kuli ki CRPF.
Une u Samla u dei u volunteer ka KSU bad ha katei ka por u shongwai ha Jaiaw ha ka iing jong I kong (Dr) Garod.
Ka dei ha ka 17 tarik Jylliew ba ki CRPF kila synreit kuli naphang ia ki dkhot ka KSU bad ki paidbah ba iakhih ha sor Shillong ha kaba bun ngut kila mynsaw jur bad u samla Paul Makri lem bad uwei pat, kila kyllon iap hajuh.
U Iskai Makri, u paralok ba ia sah lang bad u Paul Makri u la iathuh kumne:
“Ka don ka jingiakhih kaba shyrkhei bha ha Mawkhar bad Motphran. Nga bad u Paul ngi leit ban iakhun pyrshah ia ki bar jylla bad ki CRPF ha Motphran. Hadien kane jingiakhun kaba la neh katto katne por, ki CRPF ki la sdang ban wan da ki trok bad load ia ki rifles ki jong ngi. Nga ong ia u Paul Makri ban ia phet noh namar kine ki CRP kin sa siat, u Paul u pyneh bad u ong pynban ngam salia ban iap na ka bynta ka ri bad ka Jaidbynriew. Hadien kane nga la ran kham shadien bad u Paul Makri u iakhun beit shakhmat. Sa kham shiphang nga leit khot biang ia u Paul hynrei u kyntait war bad ong biang ba ngam salia ban iap. Nga leit khot biang sa shisien hynrei u Paul u pyneh hi triang bad ong ba um tieng ia ka jingiap”
U Biswal Paul Makri u la shah synreit kuli ha ki CRPF haduh ba ka khlieh jong u ka la pra phum bad kyllon iap ha madan. Ha ryngkat u Paul, uwei u daju Khasi na Smit u bym don bynta ha ka jingiakhih u la shah bat ha ki CRP ha iewduh bad u la shah bom shah tied bad shah siat iap.
Ha kane ka por u samla Paul u dang don ha ka rta kaba dang lung ha kaba u dang 16 snem. U dang don ha ar tylli ki jingpule, kata ka jingpule klas 9 ha Government Boys School bad ka jingpule Karate ha YMCA ha ka White Belt.
Ka jingiap u Paul Makri ka la pynkyndit bynriew ia ki nongshong shnong ka Western Ri Bhoi kaba la jyllei da ki poiei. Ki paidbah ki mih shnong ban beh krad lut ia kine ki poi eii bad ka Western Ri Bhoi mynta ka la dei ka thaiñ kaba ia shong ia sah tang para Khasi.
-Western Border Area ryngkat ka KSU Umrit Unit, ha ka sngi Ba-ar, kala kynmaw burom ia u dkhot (L) Paul Biswal Makri, u samla uba kyllon iap ha ki ktang suloi ki CRPF ha ka jingiakhih ka KSU ha Shillong, ha u snem 1987.){kind=link}