Shillong, Risaw 21 : Ka Khasi Students Union (KSU)-Umsning Circle ha ka sngi Balang, kila leit ban pahara hajan ka pung Nongmahir ban khanglad ia ka jingthmu jong ki Puja Committee ka thain Zero Point, ban bret Blei Puja ha Dam Nongmahir.
Ia kane ka jingpahara la ialam da u President ka KSU Umsning Circle samla Lester Nongbeit bad u General Secretary samla Laraplang Nongbri ha ka jingiadonlang u Rangbah Shnong ka Nongmahir Bah Elbin Ripnar.
Kat kum ka kyrwoh, la iathuh ba hadien ka jingap pahara ba katto kayne por, ka Puja Committee ka thain Zero Point kim shym la poi ban bret Blei ha ka pung Nongmahir namar ka jingtip ba ka seng ka pyrshah ia kane ka kam.
Kumban shu pynkynmaw, ka KSU-Umsning Circle ha u snem 2023, kala khang pyrshah bad maham jur ia ka Puja Committee ka Umsning ba kan bret Blei ha ka wah Umran Diary bad mynta pat kala khang pyrshah ia ka Puja Committee ka thain Zero Point ban bret Blei ha pung Nongmahir.
Ka KSU kala pynpaw ruh ba ka jingbret Blei pathar ka dei ka jingpynkhein ia ka Water (Prevention and Control) Act 1974 bad kumjuh ia ki kyndon bala pynmih da ka Central Pullution Control Board ha u snem 2010,k ata ka dei ban pyn ngam um ia ki Blei da kaba tih hi ia ki Artificial Pond lane ki pung kiba tih hi shipor.
Ha kane ka juh ka sngi naka liang ka KSU Umsning Circle kala pynlong ruh iaka jingthung dieng ha shi lynter ka Pung Nongmahir, kaba la ia shim bynta lang daki Nongialam bad ki dkhot jong ka Umsning Circle.
