Shillong, Jylliew 16: Ka Federation of Khasi, Jaintia & Garo People (FKJGP) kala dawa ia ka tnad ka koit ka khiah ka jylla, ba ka dei ban nym pynbor ia ki khynnah ba kin shim ia u Aadhaar ha ka por ba ki leit ban phah sumar kyrkieh bad ong ba kane ka jingbuh kyndon kaba buh ia ki longiing na ki jaka nongkyndong “ha ka jingeh kaba khraw bad jingpynkhuslai”
Ha ka shithi kaba la phah sha u CEO ka State Nodal Agency jongka Meghalaya Health Insurance Scheme, u President ka FKJGP u Bah Dundee Cliff Khongsit ula ong ba ki kmie ki kpa man la ka por kila shah pynbor ban pyni ia ka Aadhar Card jong ki khynnah ban ioh ia ka jingshakri ha ka jingsumar hapoh jong ka MHIS Scheme, ka jingpynrung ne Admission, ka jinglum jingtip ia ki kot ki sla ne ka jingai jingiarap ha ki jingjia kiba kyrkieh”.
Ula pynpaw ba bun ki longiing na ki thain nongkyndong kim shim la pynrung kyrteng ne register ia ki khun namar ki daw ki bym lah ban batai.
Ka Federation kala pynkynmaw ia ki bor khmih ba u Aadhaar um long uba kongsan ban ioh pdiang ia ki jingshakri kiba kongsan, khamtam haba ka jingkyntait ia katei ka lah ban ktah jur ia ka hok ha kaban ioh jingshakri bad ia ka bha ka miat jong ki nongshong shnong kumba la rai da ka Supreme Court.
Ka FKJGP kala ong, ba bun na ki nongshong shnong ha nongkyndong kila iai bteng ban mad ia ka jingeh bad jingshah pynslem wat haba ki kmie ki kpa kidei kiba lah don ia u Aadhaar uba dang treikam.
“Kane ka rukom leh shilliang khmat ka buh jingeh ia ki longiing kiba duna ha ka ioh ka kot bad ia ki paitbah ha ki thain nongkyndong” la pynpaw ha ka shithi.
Da kaba kdew ia ki jingdkoh ha ki jaka pynrung kyrteng, u Bah Khongsit ula thoh
“Kiba bun ki jaka rejistar ne Registration Counter ki treikam suki bha ha kaba hap ban ap slem bha bad kiba bun ki Centre kim shim la treikam da ki sngi namar ka jingthud ha ki kor ki bor, ka jingbym don ia ka kor internet ne ka jingduna ban don ia ki briew kiba trei ia ka kam”
Ula bynrap ba “Ki kmie ki kpa ryngkat bad ki khun bad ki khynnah kiba dang rit, kila mad ia ka jingeh ha ka bormet bad ka pisa ka tyngka namar ba ki hap leit bunsien” bad ka maham ba “Ha ki jingjia kiba donkam kyrkieh, ka jingpynslem kila mih namar ka jingpan ia u Aadhaar kaba lah ban buh ha ka jingma kaba khraw ia ka jingim briew.
Ka FKJGP kala kyrpad ia ka Tnad ban “Ai ka jingbthah kaba shai kdar ia baroh ki jaka ai jingsumar bad ia ki tnad ba ym dei ban kyntait ne pynslem ban ai iaka jingai ia ka jingsumar kaba kyrkieh namar ka jingbym don Aadhaar ki khynnah” bad “Ban pdiang ia kiwei pat ki phom ban pynshisha ne ki Aaadhar jong ki kmie ki kpa haba donkam”.
Kala kyrpad ruh ba dei ban pynkhlain ia ka jingpynrung kyrteng ha ki thain nongkyndong ban pynbun ia ki nongtrei bad ban khmih bniah bha ia ki Registration Counter kiba lah don lypa.
“Ngi kyrpad ba phin tuklar mardor halor kane ka mat bad ngi kyrmen ba un shim ia ki lad ban ialeh ban pynbeit noh mardor” la ong ka FKJGP.
 kala dawa ia ka tnad ka koit ka khiah ka jylla, ba ka dei ban nym pynbor ia ki khynnah ba kin shim ia u Aadhaar ha ka por ba ki leit ban phah sumar kyrkieh bad ong ba kane ka jingbuh kyndon kaba buh ia ki longiing na ki jaka nongkyndong “ha ka jingeh kaba khraw bad jingpynkhuslai”){kind=link}