Shillong, Jylliew 16 : Ka Committee u Justice BP Katakey kala ai jingmut ia ka Sorkar Meghalaya ba kan wanrah mardor ia ka policy ha kaban khang khyrdep lut ia baroh ki par dewiong ba tih thliew khnai hapoh ka Jylla hadien ka jinglap ia kawei ka metiap u briew bym lah ban ithuh na kawei ka par dewiong ba shu iehshrah ha East Jaintia Hills.
Ha ka 38th Interim Report bala aiti sha ka Iingkashari Meghalaya High Court, ka Committee kala kdew ia ka jingioh tam ia ka metiap bala pyut jong u briew na ka par ba jylliew 50 phut bad bala shlei um ha Mulait Bri Sumer myn ha ka 10 tarik Jymmang, 2026.
Ka post mortem ka batai ia ka daw ka jingiap ba dei na ka jingnguid um bad ka sngi ba u iap ka long kumba 2 taiew eiei.
Ka Committee ka ong ba ka jinglap ia ki metiap na ki thliew par dewiong ba shu ieh khlem jingker, ka pyni ia ka jingma kaba ap ia ka jingim ym tang jong ki jingri jingdup hynrei jong ki briew ruh kumjuh.
Kala pynpaw ba ki don “palat 22,000 tylli kum kine ki thliew par dewiong” ha Meghalaya, kynthup ha East jaintia Hills, kumba la buh jingthoh ha ki kaiphod kiba hashuwa.
Ka Committee ka ong “ka long kaba kongsan ban don ia ka plan ban khang dam ia ki par bad ban shna jingker noh mardor ia ki thliew par dewiong ba shu ieh tad haduh ban da khang syndon ia kine ki par, ka dei kaba long kongsan bha” ban bat ia ka hok tynrai ban im kat kumka Article 21.
Kala kyntu ia ka Sorkar Pdeng ban wanrah ia ka policy ha kaban khang dam noh ia baroh ki thliew par dewiong ba tih thliew khnai bad ban pyntreikam hapoh ka por kaban buh.
Ka Committee kala ai jingmut ruh ban ithuh noh mardor ia ka metiap bad ban siew ia ka bai lutksan namar ka jingbym lah ban iada ia ka hok tynrai une u briew.
