Dibrugarh, Jylliew 15: Ki Pulit ka Dibrugarh ki la kem ïa 6 ngut ki nongïalam jong ki seng bapher bapher ha kaba ïadei bad ka jingkynnoh rahbor, thombor, bad dawa pisa na uwei u nongtrei ka contractor jong ka Oil India Limited (OIL).
Ïa kine ki nongshah kynnoh la kem ha kaba ïadei bad ka Duliajan Police Station Case No. 75/2026 kaba la register hapoh ki kyndon 118(2), 140(2), 308(5), bad 331(8) jong ka Bharatiya Nyaya Sanhita (BNS).
Kitei ki briew kiba la shah kem ki dei kiba la tip kyrteng kum u Rintu Dutta, President jong ka Bir Lachit Sena ha Dibrugarh district unit; u Konkon Rajkonwar, President ka Duliajan Anchalik Committee jong ka (kynhun Basanta-panthi) jong ka Tai Ahom Students’ Union; Manash Pratim Gohain na Indrapuri, Duliajan; bad u Binod Sonowal na New Colony, Duliajan.
Katkum ki pulit, kane ka case ka mih na ka jingujor ba la ujor da u Uttam Jyoti Bora uba dei u heh jong ka Udipta Energy and Equipment Private Limited, u contractor ba la thung da ka OIL. U nongujor u la kynnoh ba ha ka miet jong ka 10 tarik u Jymmang, ka kynhun ki riew shimet ki la rung jubor shapoh ophis jong ka kompeni, ki la thaw ia ki kam ba long pyrshah, ki la rahbor jubor ia u ha ka kali, ki la shoh la dat ia u, bad ki la dawa pisa.
Da kaba pynshong nongrim katkum ka FIR, ki pulit ka Duliajan kila register ki case bad sdang ban pynlong ka jingtohkit. Kham mynshwa ki pulit ki la kem ia u Ranjit Bora bad u Prahlad Gogoi ha kaba iadei bad ka Duliajan Police Station Case No. 73/2026 katkum ki kyndon 3(5) bad 308(4) jong ka BNS.Ia kine ki arngut kiba shah kynnoh la dep ban set ha judicial custody.
Ha kajuh ka por, ki pulit ki la pynlong ruh ia ka jingkhynra ha kawei ka jaka sah (residential quarter) jong ka OIL ha Duliajan ha ka jingpyrshang ban kem ia uwei pat u nongshah kynnoh uba don jingiadei bad katei ka kam. Hynrei la kynnoh ba utei u briew u la lah ban phet krad na ka jingshah kem hadien ba u la tip ia ka jingdon jong ki pulit.
Ki tyllong khubor na ki pulit ki la iathuh ba ka jingpyrshang ka dang iaid shakhmat ban wad bad kem ia ki briew kiba dang sah kiba shah kynnoh, bad ka jingtohkit ka dang iaid shakhmat.
“Haduh mynta ngi la kem 6 ngut ki briew ha kaba iadei bad ar tylli ki FIR ba la ujor ha Duliajan police station.Ngi dang tohkit ia kane ka kam bad ka jingkem kaba kham bun ka lah ban jia,” la ong u Atul Kumar, u Dibrugarh additional superintendent of police (crime).
.){kind=link}