Shillong, Jylliew 14: Hynniew ngut ki nongialehkai Kickboxing na ka St. Francis De Sales Secondary School, Laitkor hynne ka sngi u Blei, kila mih ban leit sha Indore, Madhya Pradesh ban iashimbynta ha ka Sub-Junior National Kickboxing Championship, kaban sdang naduh ka 17 haduh ka 21 tarik u Jylliew, 2026.
Kine ki nongialehkai ki kynthup ia ki 4 ngut ki kynthei bad 3 ngut ki shynrang hapdeng jong ka 8 -14 snem ka rta bad kitei baroh kidei ki khynnah jong katei ka skul.
Kine ki khynnah kila ioh jingbit na ka Principal jongka St. Francis De Sales Secondary School kaba la shah ia ki ban leit iashimbynta ha ka lympung iakob ialehkai bad ynda kila wanphai na Indore kin hap ban iakhun pat ia ka eksamin hadien ka 23 tarik u Jylliew.
Dajied Kyrpang Synjri na Laitkor Rngi un mihkhmat ia ka jylla ha ka Kick Light bad Low Kick hapoh jong ka kyrdan 48kg.
Ki khynnah Klas VI ka Zyarra Kharkongor bad Bashanpaia Kharkongor na Laitkor Nongdaneng kin iashimbynta ha ka Light Contact hapoh ka 38kg bad Kick Light hapoh ka 40kg.
Ka khynnah kaba dang 8 snem ka rta ka Heilina Sad na Laitkor Mawrie, kaba dei ka nongialehkai kaba dang rit tam ha ka kynhun, kan iakhun ha ka Light Contact hapoh ka 42kg bad Point Fighting hapoh ka 28kg. Ki khynnah Klas VIII ka Abigail Ridamaka L Pyngrope bad Ribhadaker Bina na Mawlyngad, Jowai Road kin iashimbynta ha ka Kick Light hapoh ka 40kg bad Light Contact hapoh ka 48kg.
La pynlong ia ka jingialang ha Hotel Assembly, Police Bazar, Khyndai Lad, ha kaba la phah da ka jingkitbok kitrwiang ia katei ka kynhun.
U Bah Shaiborlang Lyngdoh Mawphlang, Co-Adviser jongka Meghalaya State Kickboxing Association, ula ai ka jingiaroh ia ki bor pyniaid jong ka skul halor ka jingkyrshan ia kine ki khynnah ialehkai bad ka jingplie lad ia ki ba kin iakhun ha ka lympung jong ka ri, ha kaba ki nongialehkai kiba pawkhmat bad kiba tbit kin shah jied ban mihkhmat ia ka ri India ha ki lympung iakob kiban long ha kylleng ki ri.
U Press & Information Secretary ka Meghalaya State Kickboxing Association u Bah Lorenzo Pearson Warjri ula kyntu ia ki kmie ki kpa ba kin wan mih sha ka Association ban ioh ia ka jingkyrshan khamtam ha kaban ioh jingbit na ka skul ha ka jingleit iashimbynta ha ki lympung iakob ialehkai bad ka pynpaw ba ki skul kum ka St. John Bosco’s Boys Higher Secondary School, Sohra kila pyni ia ka nuksa kaba bha tam.
Ula pynpaw ruh ia ka jingsngewnguh ia u License Coach u Babit Kharsahnoh bad ia ka Felicia K Synjri kaba bat ia ka kyrdan kaba 10 ha ka pyrthei ha ka Kickobing ne World No. 10 International Kickboxer kiba la ai jinghikai ia kine ki heprit.
Ia katei ka kynhun yn ialam sha Indore da ka Daniella I W Mylliemngap kaba dei ka nongialehkai Kicboxing kaba la pawnam ha ka pyrthei.
Ha kane ka jingialang ban phah ia kine ki nongialehkai la pynkut da kaba buh jingduwai bad ka jingioh jingkyrkhu na ka Sister Principal ba kine ki heprit bad ki kmie ki kpa bad ka kynhun baroh kawei, kin poi suk poi saiñ bad ba kin ioh kheit ia u soh ka jingjop.
