Shillong, Jylliew 11: U Symbud Myntri Rangbah ba khmih ia ka tnad Transport Bah Sniawbhalang Dhar ha ka sngi Palei ula pynlait ia ka One Time Settlement Scheme na ka bynta ki kali kamai ba khlem siew khuid ia ki khajna bad ki kuna ba iadei bad ka jinglong jingman (fitness) ki kali.
“Kane ka skhim kala don, bad mynta ka sngi ngi lah pynlait ia ka ba kan sdang treikam noh. Naduh lashai, ki paitbah ki lah ban wan shakhmat bad siew pyndep ia ki jingsiew ki jongki kumba ngi lah pynbna ha ka jingialang jong ka Kynhun Myntri” ong u Bah Dhar.
Hapoh jongka OTS, ka sorkar kan map noh haduh 80% ia ki khajna jongka Motor Vehicles Tax bad Goods Tax bad 90% ia ka Fitness Penalty ia baroh ki kali kamai naduh kiba rit haduh kiba heh, khlem da peit satia ia u snem.
“Kane ka OTS kadei na ka bynta baroh ki kali kamai, baroh kiba heh bad kiba rit, ym na uno uno u snem haduh mynta. Kiei kiei ki jingsiew kiba sahteng kiba la don lypa, ki lah ban wan ban siew pyndep noh katkum ka buit treikam kaba la mynjur da ka Sorkar” ula ong.
U Bah Dhar ula ong, ba ka jylla ka don haduh T.11,000 Klur kaba dang sahteng ban siew na kumba 65,000 tylli ki kali bad na ki 12,642 tylli ki kali kiba kit ia ki briew bad ia ki mar bad palat 57,000 ha kajingshah dain kuna namar ka jingbym bit bym biang ki kali.
Hadien ka jingmap noh ia ka ram kaba kot T.800 Klur, ka sorkar ka khmih lynti ba kan ioh lumbiang ia ka T.170-180 Klur.
“Kadei lyngba ka jingiarap jong ka sorkar, hynrei ha kajuh ka por kan long ka jingpynsting ia ki trai jong ki kali” ula ong.
U Symbud Myntri Rangbah ula kyntu ia ki trai jong ki trok bad ki nongpyniaid ba kin siew pyndep noh ia ki jingshah dain kuna ban kiar ban lait na kiwei pat ki jingshah pynshitom kiban mih hadien habud.
“Hadien ba kila pyndep ia kane ka One-Time Scheme, naduh ka wat kaban wan, nga kyntu ia ki ba kidei ban wan man la ka por, khang ba kan ym don shuh kano kano ka jingpynsahteng ia ka pisa kaba dei ban siew” ula bynrap.
 ki kali.){kind=link}