Shillong, Jylliew 11: U Deputy Commissioner jongka East Khasi Hills ula kyntu ia baroh ki nongjngohkai, ki nongleit nongwan kiba thmu ban leit sha Dawki, ba kin kiar ka iaid na surok Shillong-Pynursla-Dawki tad haduh ban da pynbna da kumwei pat, haba pynpaw ia ka jingsngewkhia halor ka jingshngain namar ka jingtwa khyndew, ka jinghap ki maw bad ka jingiaid shakhmat ka jingpyntrei ia ka surok.
Ia kane ka jingpynbna la pynmih da u Deputy Commissioner & Chairperson ka District Disaster Management Authority ha ka sngi Palei, haba ong ba kane ka lynti kaba mynta ka don hapdeng ka jingma kaba khraw ba lah ban mih ki jingjia ba sngewsih.
Na ka bynta ka jingshngain jong ki paidbah, ki bor pyniaid district kila kyntu ia ki paitbah ba kin pyndonkam noh da ka surok Shillong – Jowai – Amlarem – Dawki, kaba long kaba kham shngain ban poi sha Dawki bad sha kiwei pat ki jaka jngohkai kiba don marjan.
Ki bor district kila kyntu ia ki nongleit nongwan ban kiar katba lah ban iaid lyngba katei ka jaka kaba don hapdeng ka jingshah ktah bad ban bud ryntih ia ki jingbthah kiba la pynmih da ki bor synshar shnong bad ki pulit kiba pynïaid ia ki kali.
Kila bthah ruh ia ki nongleit nongwan ba kin khmih bniah bha ia ki jingtip kiba iadei bad ka jinglong jingman jongka suinbneng bad ia ka jinglong jingman jong ki surok shuwa ba kin sdang ïa ka jingleit ka jongki bad ban long kiba husiar bha haba niah ia ki kali, khamtam ha ka por ba jur slap.
Na ka bynta kino kino ki jingjia ne jingdonkam ban ioh jingiarap haba don ka jingwan pynjulor ka mariang, ki paitbah ki lah ban pyntip mardor da kaba phone ha u number 112.
Ka Dawki, kadei ka jaka kaba la pawnam ia ka jingdon ia ka Wah Umngot kaba khuid bad shai kdar ha ka thain khappud jong ka ri India-Bangladesh, kaba khring bha ia ki nongjngohkai, khamtam eh ha ki bnai Lyiur.
Namar ka jingwan jong ka iom lyiur, ki bor pyniaid district kila ong, ba kane ka jingai ia ka jingmaham bad jingbthah kan iai treikam tad haduh ba la pynbna ba katei ka surok ka long kaba shngain ban leit ban wan bad la pyndep ruh ia baroh ki kam jong ka jingshna.
