Shillong Jylliew 11: Ka nam jong ki jingkieng jri ka Meghalaya kala nang jam shajan ban ioh ia ka jingithuh kum ka UNESCO World Heritage, da ka jingpdiang ia ka jingtyrwa ba phah ka ri India na ka bynta ban khmih bniah da ka World Heritage Committee ha u 2027.
Katkum ki kot kiba la pyllait da ka UNESCO World Heritage Centre, ka jingtyrwa na ka jylla Meghalaya ka dei napdeng jong ki 34 tylli ki jingtyrwa kiba pura kiba la ioh pdiang na kylleng ki bynta jong ka pyrthei kiban sa shah khmih bniah ha ka jingialang kaba 49 jong ka Committee ha u snem 2027.
Ia kine ki jingtyrwa la aiti da ka ri India ha u Kyllalyngkot mynta u snem hapoh jong ka Cultural Criteria (i), (iii) bad (v).
Ia kaba la tip paidbah da ka kyrteng Jingkieng Jri, Living Root Bridges (LRB), ki dei ki lad kiba weng ia ka jingeh ha ka ïaid ka wan ha ki shnong nongkyndong ba la thaw ne pynwnadur lyngba u Dieng Ficus ha ki khlaw kiba heh jong ka Meghalaya kaba don ha ka bynta jong ka thaiñ mihngi jong ka Indian Peninsular Plateau.
La thung bad pynheh pynsan da ki paid Khasi bad kine ki dienjri kila lah ban ïengskhem bad ban kyrda ruh hapdeng ka jinglong jingman jongka suiñbneng da ki spah snem ha ryngkat bad ia ka jingpyni ruh ia ka jingïadei kaba jan bad kaba ngam jylliew bha hapdeng u briew bad ka mariang.
Kine ki jingshemphang ryngkat bad ka sap ka phong kidei kiba la mih bad hiar na kawei ka pateng sha kawei pat bad la iai bteng ban leh ia kane haduh mynta, kaba pynshisha ïa ka jinglong kordor bad kaba ïahap bha. Da kaba ialeh ban pynsuk ïa ka ïaid ka ïeng bad jinglah ban kyrda na ki jinglynshop ka bor mariang ha palat 75 tylli ki shnong kiba don sha jngai bad hajan jong ka thaiñ kaba dei ka jaka kaba slap bha ha ka pyrthei, ki Jingkieng Jri ki pyni ïa ka jingshemphang bad jingkyrda jongka kolshor kaba naduh kulong kumah, ha kaba kala don ruh ka jingïatreilang bad jingïarap mar kylliang ha kaban tei ia ki mawnongrim jong ka jingim.
Ha kaba sdang jong u spah snem ba 19, ki jingthoh halor ka jingkieng jri kala pynshisha ia ka riti dustur kaba phylla jong ka ri India da kaba shna ia ka jingkieng hajan ka Cherrapenjuee ne Sohra. Kaba la pynshisha ia ka jingroi jongka jingkhlain bad ia ki tynrai dieng kiba jwat, kine ki rekod ki pyni ia ka rukom pynwnadur ha ka liang jong ka “Engineering” bad kaj ingnoh synniang jong ki jingthung jingtep kaba la noh synniang ia ka jingkhlain baroh jong katei ka jingtei.
Ka jingpynrung ia kane ka jingtyrwa sha ka kyrdan ban shah bishar ka long u mawmer ba kongsan ha ka jingïalap ka Meghalaya ban ïoh ïa ka jingithuh ha ka pyrthei baroh kawei ïa kine ki Jingkieng Jri kiba phylla, ka jingthaw kaba phylla kaba la shna lyngba ka jingioh jinghikai bad jingthain ia ki thied dieng halor jong ki wah bad ki wahduid, ka rukom leh kaba janai da ki paid Khasi bad Jaintia la bun pateng.
Ki kot ki sla ka UNESCO ki ithuh ia kane ka jingtyrwa kum ka Cultural Landscape kaba kynthup ïa ki lai tylli bynta, kaba pyni ïa ka jingïadei kaba iajan hapdeng ki shnong bad ka mariang, kaba la pynmih ïa kawei na ki nuksa ba kyrpang tam jong ka jingtei ia ka jingkieng jri ha ka pyrthei baroh kawei.
Kane ka jingtyrwa mynta kan shah bishar bniah ha ki kynhun jong ka UNESCO shwa ban rah hakhmat jongka World Heritage Committee kaban shim ïa ka rai kaba khatduh ha u snem 2027.
Napdeng jong ki 46 tylli ki jingtyrwa kiba la phah na kylleng ki ri hashwa jongka tarik khatduh kaba la buh ha u bnai Kyllalyngkot 2026, kila don tang 34 tylli kiba la lah ban pyndep ïa ka jingbishar bad la pdiang ba kin dang hap ban ïaid shakhmat ban shah khmih bniah shuh shuh. Ka jingpynrung ia kane ka jaka jongka Meghalaya ha katei ka thup ka pyni ba kane ka jingtyrwa ka dang ïaid beit shakhmat mynta.
Lada kane ka jingtyrwa ka ioh ia ka jingmynjur, kumta ka Jingkieng Jri kan rung lang bad kiwei pat ha ka UNESCO World Heritage Sites kiba la ioh ia ka jingithuh namar ka jinglong kordor jongki ha ka pyrthei bad kan don ruh ka jingphai khmat na ka pyrthei ia ki sap ki phong tynrai jong ki nongshong shnong ha ka rukom shna jingkieng bad ka jingialam ka shnong ka thaw ha kaban leh ia ki kam ban iada bad pynneh pynsah ia ka mariang
