Shillong, Nailar 12: Ka Lok Bhavan Shillong kan plie naka bynta ki paidbah ha ka 15 bad 16 tarik u Nailar kum shi bynta ban rakhe ia ka sngi laitluid kaba 80 snem jong ka ri India.
Ka kyrwoh na Governor’s Secretariat, ka pyntip ba ka ka por baka Lok Bhavan Shillong kan plie naka bynta ki paidbah kadei naduh ka por 1.30 baje nohphaisngi haduh ka por 8 baje mynmiet ka 15 tarik u Nailar, bad naduh ka por 11 baje mynstep haduh ka por 8 baje mynmiet ha ka 16 tarik u Nailar, ha kaba ki nongwan kai ruh kim donkam ban siew pisa.
Ki nongwankai kin ïoh ban sakhi ïa ki jingpyni kolshor kiba mihkhmat ïa ki bynta bapher bapher jong ka ri bad kumjuh ruh ïa ki riti dustur Khasi, Jaiñtia bad Garo jong ka Meghalaya.
Ha kane ka prokram yn pyni ia ka shad Bhawai Dance bad Kalbelia na Rajasthan bad ka shad Dogri, Kashmiri, Gojri bad Pahari na Jammu and Kashmir.
Kiba wan na Karnataka, kin shah pynbyrngia daka jingshad Bharatanatyam, ha ryngkat ka jingpyni ia ka kolshor da ka kynhun tem na Karnataka Sangha, Mandya.
Ki program ba mihkhmat ia ka Meghalaya, kin kynthup ka kynhun pyni kolshor bad riti dustur jong ki jaidbynriew Khasi, Jaintia bad Garo. Ka kynhun tem jong ki shipai na Assam Regimental Centre kin tem ha ha kane ka sngi.
Ki jingrakhe sngi laitluid kin kynthup ruh ia ka jingpyni nam iaka kam ka rep ka riang, ka rep syntiew, bad kiwei kiwei ki bynta, ha kaba yn pyni ia ki mar rep, ki syntiew orchid.
Ki nongwankai ki lah ruh ban ïohi ïa ki tiar tynrai, ki kot lyngkdop, ki tiar shna kti bad kiwei kiwei ki tiar katba ki jaka die jingbam kin ai ïa ki jingbam tynrai.
Ha ki por janmiet, yn pynshai yn pynthaba iaka Lok Bhavan da ki Light jong ka lama lai rong (Tricolour).
Ka Governor’s Secretariat ka la ong ba ka jingplie ia katei ka jaka sha ki paidbah ka dei ruh shi bynta ban pynkylla ia ka Raj Bhavan sha ka Lok Bhavan, da kaba kynriah noh na ka jingmut tynrai jong ka Raj Bhavan kum ka “ing jong u nongsynshar” sha ka Lok Bhavan kum ka “ing jong ki paidbah”.
