Shillong, Nailar 12 : U Myntri Rangbah Conrad K Sangma ha ka sngi Balang ula ong ba ka NPP ka dei kaba nyngkong eh ban leit pynpaw ia ka jingsngewkhia ka Jylla halor ka FCRA Amendment bad ka Sorkar Pdeng.
“Ha ka por ba wanrah ia ka Bill ha Iingdorbar, ka NPP ha ka jingshisha, dei ka party kaba leit kren nyngkong ia kane ka kam ha katei ka por. Nga la ialam ia ka kynhun CBCI, kynthup ia u President bad General Secretary, ban iakynduh ia u Kiren Rijiju” ong u Conrad.
Ula bynrap ba ia ka kynhun ba-ar na Meghalaya la ialam pat ba iakynduh ia u Myntri kam Pohiing ka Ri.
“Ngam kynmaw ban don kawei ruh ka seng sain pyrthei ka ban leit iakren beit beit bad ka Sorkar ne ki Myntri ka Sorkar hadien kata. Hadien kane, ngi iohi tang saw ngut ki Myntri Rangbah bad kiwei ruh ki seng sain pyrthei” ula ong.
U Conrad ula ong ba ka jingleitiakren kam dei satia ban myntoi sain pyrthei.
“Ka shu long ba ngi don ia ka jingiadei bad iajan bad ki seng bapher bapher. Ha ka por ba ngi ioh ia kane ka jingtip, kumka jingsngewkhia, ngi la kynthoh mar mar bad ialam ia ka kynhun sha Delhi” ula ong.
Haba pdiang ia ka jingphah ia ka Bill sha ka Joint Parliamentary Committee, ula ong “Ngi sngewnguh ia ka Sorkar ba kala phah mynta ia ka bill sha ka JPC. Ngi kyrmen ba ka Committee kan sngap bad leh eiei ia baroh ki jingsngewkhia na ki seng bapher bapher, ki Balang bad kiwei ki kynhun niam”.
