Shillong, Jylliew 9: Ka Meghalaya kam lah ban shu sah shadien ha ka juk jong ka Artificial Intelligence bad ka hap ban pynbeit ia ka rukom ai jinghikai, ong u Myntri ka Pule Puthi Bah Lahkmen Rymbui ha ka sngi Baar haba pynpaw ia ka jingduna ki nonghikai kiba la pyntbit kum u mawjynthud ban pyniaid shakhmat ia ka jingpule jong ka AI.
U Bah Rymbui ula ong, ba ka jylla ka dang peit ban wanrah ia ka jingkylla hynrei ka jingiaid shakhmat kan shong pat ha ka jingiatreilang bad ki kynhun halor ki kor teknoloji.
“Peit ngi hap ban ia beh bad ym tang ban shu kem hynrei ngi hap ban iaid bad kane ka juk kaba mynta ne ka rukom kaba thymmai ha ka jingai jinghikai.
Dei halor kane ba ngi dang pyrshang ban wanrah ia ka jingkylla, ka jingkylla ha kata ka rukom ia kaba donkam ban leh. Hynrei haba nga ong kumtei, ka long kaba suk ban shu kren ban ia kaba leh namar ba ngi donkam ban iatreilang bad kino kino ki paralok. Mynta lada phi ong ba ka AI ban pyniar ha baroh ki skul kumta ka jingkylli kaba mih ka long mano ban hikai ia katei ka sobjek lada ngi kynthup ia ka ha ka Curriculum? Ngi hap ban pyndonkam ia ki teknoloji” la ong u Myntri.
Ula pynpaw ia ka jingkongsan ban pyndonkam ia ki kor teknoloji kadei ka lynti, watla ki tiar ki lah ban long ki ban treikam tang shipor ne Outdated.
“Ngim lah ban thung ia ki nonghikai AI ne AI Professor, hynrei ngi hap ban pyndonkam ia ki teknoloji katba don ia ki kor teknoloji, ki lah ban long ki bym treikam shuh ha ki 10-15 snem. Hynrei ngi hap ban iaid shakhmat” la ong u Bah Rymbui.
U Myntri ula bynrap ba ka sorkar pdeng ka dang ialeh ban pynbor ban pyniar ia ka jingpule ha ki teknoloji kiba thymmai bad ka lynti iaid jong ka Meghalaya kan long kaba shai kdar ha ki por kiban wan.
“Ym tang ka sorkar Meghalaya, wat ka sorkar India kala ithuh ia ka jingdonkam ban pule ia ki teknoloji kiba thymmai. Kumta baroh kila don ha ka miej hynrei ngi hap ban ban iaid shakhmat. Kumno ngin iaid shakhmat ngin sa tip ha ki por ban wan” ula bynrap.
