Tura, Jylliew 09 : Ka Garo Hills Autonomous District Council (GHADC) ha ka sngi Ba-ar, kala pynlong ia ka jingkhynra kaba jur pyrshah ia ki jaka treikam bad ki dukan ba khlem ka licence Trading by Non-Tribal (TNT) bad kiba khlem siew ia ka professional tax bad khangdam ruh ia kiba bun ki dukan ha Tura kynthup ka ICICI Bank ha Hawakhana.
Kane ka kam ka phah ia ka khubor kaba tyngeh ba ka jingbym bud ryntih ia ka TNT bad ka jingsiew khajna kaba hap ban leh da baroh ki dukan bad ki jaka treikam hapoh u pud u sam ka Council.
Bun tylli ki dukan bad ki ki jaka treikam ha kylleng ka sor kila mad ia ka jingshah khang khyrdep ha kane ka jingkhynra ka GHADC ban pyntreikam thikna ia ki kyndon ka TNT bad ban pynkhlain ia ka jinglum khajna.
Ka Licence TNT ba ai da ka GHADC, ka long kongsan ia baroh ki bar jylla, ki kompani bad ki jaka treikam hapoh ka jaka Sixth Schedule ka ri-lum Garo.
Ki Ophisar ki pyntip ba ka jingkhynra ka dei kaba la leh da ka jingthmu ban pynthikna ia ka jingbud ryntih ia ki ain bad pynthikna ba ki dukan ne ki jaka treikam ki pyndep ia kaei kaba ki hap ban leh kat kum ki ain.
Kila pyntip ba kane ka jingkhynra kan dang iai bteng bad ka Council kan leh da kaba tyngeh pyrshah ia kito ki bym don ia ki Licence TNT, bad ki bym siew khuid ia ki khajna.
Ka GHADC kala bthah ia baroh ki nongkhaii, ki nongsengkam bad ki jaka treikam ba trei hapoh u pud u sam ka Council ba ki dei ban bud ryntih ia ka TNT Act bad siew khuid ia ki khajna khnang ba kin lait na ki jingshah dain kuna, jingshah khang dam ki jaka treikam bad pynthut ia ka trei ka ktah jong ki.
 ha ka sngi Ba-ar, kala pynlong ia ka jingkhynra kaba jur pyrshah ia ki jaka treikam bad ki dukan ba khlem ka licence Trading by Non-Tribal (TNT) bad kiba khlem siew ia ka professional tax bad khangdam ruh ia kiba bun ki dukan ha Tura kynthup ka ICICI Bank ha Hawakhana.){kind=link}