Jowai, Jylliew 07 : U Myntri ka Koit ka Khiah ka Jylla Bah Wailadmiki Shylla ha ka sngi Satjain, ula leit jurp ia ka Ummulong Community Health Centre ha West Jaintia Hills District kum shibynta na ka jingpynkhreh ban kyntiew kyrdan ia ka sha ka Integrated Hospital ha ka jinglut ba T,53 klur, ka project ba ula pynbna dang shen.
Ia u Myntri la synran da u Medical Officer ba khmih ia ka Ummulong CHC, ki nongialam Shnong bad ki nongtrei ka Health Engineering Wing.
U Myntri ula shim jingkhein ia ka jingtei kaba doon mynta bad pynlong ia ka jingiakren bad ki bor khmih halor ka jingpynkhreh ia ka Detaled Project Report.
Haba kren sha ki nongthoh khubor hadien ka jingjurip, u Myntri ula ong ba kane ka jingwan iuhkjat jong u ka dei kaba thmu ban bishar ia ka jinglong jingman jong kane ka jaka bad ban pyndep ia ka DPR khnang ba yn lah ban khot tender noh kham kloi kat kaba lah.
“Nga kwah ba ka kam kan sdang noh kham kloi kat kaba lah na ka bynta ka jingmyntoi jong ki paidbah” ula ong.
Ka kynhun kala iakren ruh halor ka jingdonkam nongtrei na ka bynta ka hospital, kynthup ka jingbuh ia ki doktor specialist, ki medical officer bad ki nongtrei Grade IV.
Halor ki tiar sumar, u Myntri ula iathuh ba ia ka jingthied tiar yn sa shong pyrkhat hadien bala pyndep ia ka jingtei kaba thymmai.
Haba batai ia ka jingjied ia ka Ummulong CHC ban kyntiew kyrdan, u Bah Wailad ula ong ba kane ka jaka sumar ka shakari kum ka jaka sumar ba hapdeng eh jong kiba bun ki shnong kiba hap hapoh ka Laskein bad ka Nadong C&RD Block.
Ula pynpaw ba ki nongpang na kine ki thain ki hap ban iaid lyngba ka Ummulong CHC hashuwa ba kin poi sha ka Jowai Civil Hospital.
“Kumta, ka long kaba donkam ban pynkhlain ia kane ka jaka sumar. Ka Ummulong CHC kaba khlain kan iarap ruh ban pynduna ia ka jingwan tuid ki nongpang ha Jowai Civil Hospital bad ka MCH Hospital” ula bynrap.
