Shillong, Jylliew 07 : U samla Raymond Kharjana ula bam smai kum u President ba thymmai jong ka Khasi Students’ Union ha ka sngi Saitjain bad ula kular ban pynjur ia ka jingialap halor ka jingdawa ban pyntreikam ia ka Inner Line Permit, ban iada ia ka khyndew ka shyiap, ban wanrah ia ka jingkylla ha ka pule puthi bad halor ka jingtih ia u Uranium.
Haba ai jingkren ha ka sien kaba nyngkong eh hadien ka jingdep tian smai, u Kharjana ula ong, ba ka KSU ka don bun ngut ki shipai kiban mih shakhmat ban trei bad leh eiei nalade, hynrei ngim dei ban pyndonkam bakla pat ia la ka kyrdan ne ka bor”.
Ula pynpaw ialade “Ba udei u samla u bym ju buhrieh bad u bym ju tieng” bad ka bynrap “Nga ngeit skhem ba baroh ki nongialam samla mynta kim ju buhrieh eiei ne ban sheptieng ia ki ain ki kanun kiba ka pynjari”.
Ula ong ba ka Inner Line Permit kadei ka mat kaba kongsan bha jong ka KSU, u Kharjana ula ong, “Ka seng kan ym kynran dien tad haduh ba la pyntreikam ia ka hapoh Meghalaya.”
Ula kynthoh pyrshah ia ka rukom leh jong ka Sorkar Pdeng hadien ka jingiakynduh ia u Myntri Kam Pohiing ka ri. “Ka long kaba sngewsih ba ha ka por ba ngi lah poi kala shu kut tang da ka jingaiti ia ka dorkhas. Kam shim la don satia kano kano ka jingiakren kaba shisha ban pynbor ia ka Sorkar Pdeng ban ai noh ia ka ILP.”
Ha kaba iadei bad u Uranium ha Domiasiat, South West Khasi Hills, ula maham da kaba ong, lada ki ktah ia u Uranium uba don ha Domiasiat, South West Khasi bad ka kynhun kan sakhi ia ka jingbitar lep, ka jingdim bad ia ka jingpynphai kylla da kaj ingbitar.
Haba pyniasoh ia ka projek rel bad ka jingwan rung kyrthep kiba nabar, ula ong “Khlem kano kano ka ain ban khmih bniah ia ka jingwan rung be-ain ki briew kiba nabar sha ka jaka ka jong ngi, ngi ngin ym mynjur ia kano kano ka jingkhot iakren ha kaba iadei bad ka rel”.
U Kharjana ula ong ruh, “Phi lah thung ia bun ngut ki nongai jingmut bad ka jingsiew ia ka tulop kaba la kot da ki klur tyngka, hynrei kawei ka ain kaba phi lah thaw kala shu khyllem suk shisien ba kala wanpoi sha Secretariat. Kane ka pyni ia ka jingthmu kaba shisha haba thaw ia ka ain ban iada ia ki jaidbynriew rit paid.
Ula kren ruh halor jong ka jingroi ka jingbym iaryngkat ha kaba iadei bad ki jaka ki puta bad ong, ba ka KSU kan pynbor ia ka Land Saving Act “ban iada na ki riewspah ha kaban thied ia ki jaka ha ka lynti kaba ngim lah ban sngewthuh”.
Ula ong ruh, “Ka jinglap jong ka kaiphod ka PGI halor ka jinghiar ka kyrdan ha ka pule puthi, u Kharjana ula kdew ba ki skul ha nongkyndong kiba don 5 ngut ki khynnah skul bad 6 ngut ki nonghikai hynrei ki don pat ki khep ba ki khynnah ki don 100 ngut hynrei ki nonghikai pat ki don tang 2 ngut”.
Ula ong ba ka KSU “Kan shimkhia bha ia kane ka ka mat bad ban pynbor arshah ban wanrah ia ka jingkylla ha kaba iadei bad ka pule puthi”.
Ha kaba iadei bad ki Competitive Examination, u President ka KSU ula ong, “Hapdeng ka jingduna ia ki jingdonkam bad jingdon jingem, lyngba ka jingiarap bad jingnoh synniang jong kiba bun ki briew kiba sngewkhia, la phah arsien ia ki samla pule sha Delhi ban ioh ia ka jinghikai pyntbit”.
Ula kular “Katba ngim pat lah ban pynmih hi ia ki IAS ne IPS ophisar na ki doh ki snam ki jong ngi, ka seng kan ym shongthait. Ngin pyrshang beit katba nang mih ki snem”.
U Kharjana ula pynpaw ruh ia ka jingsngewkhia ha kaba iadei bad ka jingkhaii droks, ka wat ka baar jong ka jingiakren pynbeit pud hapdeng ka Assam-Meghalaya bad ka jingpynslem ban ai jingithuh ia ka ktien Khasi.
