Shillong, Jylliew 07 : Ka Mawsynram bad Sohra kin sa iasoh beit beit na shiliang lum sha shiliang lyngba ka surok thymmai bad ka jingkieng halor ka wah Umiam, ka project kaba u MLA ka Mawsynram Bah Olan Sing Suin u ong ba kan sa pynkylla shikatdei eh ia ki kam jngohkai ha ka thain.
Haba kren ha ka sngi Saitjain, une u MLA ula ong ba ki jingpyntrei ia ki jingtei ha ka thain kala nang iaid shaid shaid mynta bad kan pynduna ia ka por leit por wan haba khring kham bun ki nongleit nongwan sha baroh artylli ki jaka.
Halor ki surok project ba dang iaid mynta, u Bah Suin u ong ba artylli ki bynta kila iaid shaid shaid hapoh ka jingbei tyngka ka World Bank. “Ka surok na Phlangwanbroi sha Ranikor kala iaid ha ka jingpyntrei”.
“Ka surok na Weiloi sha Phlangwanbroi ka dang don mynta ha ka jingkhot tender bad ki kam la khmih lynti ban pyndep mynta u bnai Jylliew. Kam don jingartatien ba kane ka project kan sa dep hapoh 1-2 snem” ula ong haba bynrap ba ka jingpynbha ia kine ki surok kan sa nang pynbun ia ka jingwankai ki briew sha ka thain.
U Bah Suin u pyntip ba dang shen ula iakynduh ia u Symbud Myntri Rangbah Bah Prestone Tynsong bad tyrwa ban pyntrei ia ka surok kaba pyniasoh ia ka Mawsynram sha Sohra lyngba ka Dewsaw sha Nongwar, kaban pynkut ia ka jinghap leit iaid lyngba ka surok ba shathie bad lam sepngi.
“Ka Rain Museum ha Mawsynram kala don hapdeng ka jingpyntrei. Kumba nga la ong teng, ka Mawsynram bad ka Sohra ka dei ban iasoh beit beit. Ngim dei shuh ban shaniah ia ka lynti kaba jngai ba hap iaid na ka thain Shathie bad lam Sepngi. Ka surok na Mawsynram sha Sohra ka dei kaba ngi donkam” ula ong.
“Nga la iakren bad u Symbud Myntri Rangbah Bah Prestone Tynsong dang mynta arsngi. Nga kwah ba ka surok Sohra bad Mawsynram kan iaid lyngba ka surok Dewsaw sha Nongwar” ula bynrap.
U MLA ula batai ba ki kam na baroh arliang kila iaid shakhmat. Ka jingkieng halor ka Wah Umiam kan sa pyndep ia kane ka jingpyniasoh.
“Na Dewsaw sharud Wah Umiam, ka surok kala don hapdeng ka jingpyntrei. Na ka liang ka Sohra ruh, na Nongwar sha Phali, ka surok ka dang don hapdeng ka jingpyntrei. Baroh artylli ki surok kin poi harud wah bad yn pyniasoh da ka Jingkieng. Shisien bala pyndep ia ka jingkieng, ka Mawsynram bad Sohra kan sa iasoh beit beit na Dewsaw sha Nongwar” ong u Bah Suin.
