Shillong, Jylliew 03 : U Symbud Myntri Rangbah ba khmih ia ki kam Pohiing Bah Prestone Tynsong ha ka sngi Balang ula ong ba ka Sorkar Jylla kam pat pynsangeh ia ka project lynti rel hynrei kan pyniaid shakhmat tad hadien bala ioh ia ka jingmynjur lang na ki kynhun bapher bapher.
Ula ban jur ba ka jingpynurlong ia ka jingdawa pyntreikam ia ka Inner Line Permit (ILP) ka dei ka jingdonkam ba mynta mynta hi jong ka Jylla.
Haba kyntait ia ki jingiakren ba la pynsangeh ia ka project, u Bah Prestone ula ong “Kam dei ka jingkylli ban pynsangeh ia ka project. Ngim pat ju ong ba ngin pynsangeh ia ka. Kaei kaba ngi ong ka long ba ngin shim ia ka jingmynjur lang jong baroh. Kane ka dei ka mat ba hakhmat eh”.
Ula ong ba ki jingsngew u paidbah ki long kiba shai halor ki kam kiba donkam.
“Ia mynta, ka kam kaba kongsan eh ka dei kaba dang sahteng. Ki Kynhun bapher bapher, wat ki nongshongshnong ka Jylla, ki kwah ILP. Lada la mynjur ia kane, ia ka sobjek kaba ar, ka project lynti rel, ngin sa iakren” ula ong.
Ka project lynti rel ha ri-lum Khasi kala sahkut namar ka jingpyrshah kaba jur na ki kynhun bapher bapher kynthup ki Sengbhalang. Kane ka project ka kynthup ia ka lynti rel na Tetelia-Byrnihat ba 22 Km bad ka lynti rel na Byrnihat-Shillong ba 108 km.
Halor ka jingtyrwa ker sain ha khappud ka India-Bangladesh, u Bah Prestone ula iathuh ba um pat don ba ong eiei ia u hynrei la khmih lynti ba kane ka kam kan sa mih ha ka jingiakren hapoh ka jingialang ka NEC.
Ka 73rd NEC Plenary kala long ha Shillong naduh ka 3 tarik Jylliew haduh ka 5 tarik Jylliew bad yn pyniaid ia ka da u Myntri kam Pohiing ka Ri Amit Shah.
