Shillong, Jylliew 03 : Ka wat kaba ar jong ka jingiakren pud hapdeng ka Meghalaya bad Assam halor ki 6 tylli ki jaka ba dang sah ha ka jingiakajia, kan sa sdang biang tad hadien ba pyndep ia ka jingpynheh ia ka kynhun Myntri ka Assam, ong u Symbud Myntri Rangbah Bah Prestone Tynsong ha ka sngi Balang.
Haba jubab ia ka jingkylli halor ka jinglong jingman ba mynta jong ki Regional Committee, u Bah Prestone ula ong ba baroh artylli ki Jylla ki dang ap ia ka jingthaw ia ka Kynhun Myntri ha Assam hashuwa ba ki jingiahiar jurip lang kan bteng.
“Halor ki Regional Committee ba khmih ia ki jaka iakajia hapdeng ka Meghalaya bad Assam, ngi dang ap biang namar ka jingpynhreh ia ka Kynhun Myntri ha Assam kan dang ban long” ong u Bah Prestone.
Ula pynthikna ba u Myntri Rangbah ka Assam Himanta Biswa Sarma ula dang iai kut jingmut ban pynbteng ia kane ka kam hynrei ula pan por.
“U Myntri Rangbah ka Assam ula dep pynpaw ia ka jingkwah ban pynbteng ia ka jingiakren bad ka jinguajurip lang da baroh ar tylli ki Regional Committee. Hynrei ula kyrpad ia ngi ban ap haduh ban da pyndep ia ka jingpynheh ia ka Kynhun Myntri” ong u Bah Prestone.
Ka wat kaba ar jong ka jingiakren pynbeit pud ka kynthup ia ka Langpih, Borduar, Nongwah-Mawtamur, Desh Doomreah, Block-I & Block-II, bad Psiar-Khanduli.
Hynriew tylli na ki jaka iakajia la dep ban pynbeit ha ka wat kaba nyngkong lyngba ka jingiasoi ia ka soskular ha u bnai Lber 2022 ha New Delhi ha ka jingiadon ryngkat u Myntri kam Pohiing ka Ri Amit Shah.
