Guwahati, Jylliew 3: Tang hapoh 24 kynta hadien ka jingjah jong ki saw ngut ki khynnah kynthei kiba dang rit ka rta, ki pulit Assam ki la ioh ban pyllait ia ki na Howrah ha West Bengal hynrei kumno ki la poi sha Howrah, ki pulit kim shym la pynpaw.
Katkum ki khubor, kine ki khynnah ki la jah rngai na ka thain Basistha jong ka Guwahati ha ka 2 tarik Jylliew.
Kine ki khynnah kynthei, baroh ki dei ki khynnah skul jong ka Beltola Majhipara Middle English School bad ki dei ki nongshong shnong jong ka thain Basistha-Beharbari, bad la iathuh ba ki la leit skul ha ka step jong ka 1 tarik Jylliew, hynrei kim shym la wan phai shuh sha la iing.
Hadien ka jingpyrshang ban wad ïa ki kam shym la urlong, ki ba ha iing ki la ujor ba jah briew ha Basistha Police Station.Naduh katei ka por ki pulit ki la pynlong ia ka jingtohkit bad sdang ia ka jingpyrshang ban wad ia kitei ki samla pule.
Ka jingsngewkhia ka la nang jur hadien ba ki khynnah kynthei kim shym la wan phai sha la iing haduh janmiet. Ki bahaïing jong ki ha kaba sdang ki la pynlong ïa ka jingwad bnaih ha ki jaka ba marjan bad ki la ïakynduh ïa kiba haïing hasem bad kiba ithuh, hynrei ym shym la lah ban ïoh jingtip ei ei ha kaba ïadei bad ka jingjah rngai jong ki.
Kitei ki khynnah kynthei kiba la jah rngai la tip kyrteng kum ka Nirupai Ray, ka Ayushree Singh, ka Jilmil Daimary, bad ka Rumi Baruah.
