Shillong, Jylliew 02 : Ka Sorkar Jylla kala pynksan ia ki jingpynkylla ia ka rukom treikam ka Tnad Excise bad pyntreikam ia ka Integrated Excise Management System (IEMS), da kaba ong ba kine ki sienjam ki dei kiba la shim da ka jingthmu ban wanrah ia ka jingtreikam kaba shai, tehlakam ia ka jinglait tuh ka khajna bad iaid kat kum ki jingpyrrkhing hapoh ka Ri.
Kane ka jingpynshai kala mih hadien ba ki retailer kila pyrshah ia ka IEMS namar ka jingduna ka jingiohnong.
Ha ka kyrwoh bala pynmih ha ka sngi Ba-ar, ka Tnad Excise, Registration, Taxation & Stamp lala ong “ ba kala shimkhia ia ka jingkren jong ki katto katne ki seng dukan kyiad (retailer) ba iadei bad ka Integrated Excise Management System (IEMS) bad ka jingpynbeit ryntih ia ka jingiohnong ki dukan kyaid”.
Ka Tnad kala bynrap ba “don bun ki jingkam bala pynphriang ki dei kiba da jied, ki bym long pura bad ki bym lah ban kam na ka bynta ka jingmyntoi u paidbah, ki jingshisha ha ka liang ka khajna bad ka jinglong jong ka aiñ ha ka ri baroh kawei kaba la pynlong ïa kine ki jingpynkylla.”
Ka Sorkar kala ban jur ba ki sienjam bala shim da ka Jylla ki dei kiba iahap bad ki jingpynkylla bala leh ha ka ri baroh kawei.
“Ha ri Indi baroh kawei, ki Sorkar Jylla kila nang pynthymmai ia ka rukom pyniaid ia ka Excise lyngba ka jingbuddien ia ki bitor kyiad lyngba ka QR, ka jingpyniaid ia ki mar da ka kor digital, ka rukom treikam ba kham pyrrkhing, ka jingpeit ia ki lynti ai mar, ka rukom buh dor ba beit bad pynkhlain ia ki sienjam ban iada ia ka jingpynmih pisa” kala ong.
Ka Tnad ka pynpaw ba ha kine ki bun ki Jylla, ka jingioh nong jong ki dukan kyiad lah buh da ka kyrdon ba pyrrkhing bha, ia ka commission la buh da ka Sorkar, lane ia ki dukan kyiad la pyniaid lyngba ki State Corporation haba kdew ia ka TASMAC model ha Tamil Naduh bad ka Delhi kala shim ia ka shimjam ban pynkhlain ia ka jingpyniaid hi ka Sorkar ia ka kam.
Halor ka IEMS, ka Sorkar ka ong ba kane ka system ka dei kaba la wanrah ka long eh ban pynthymmai ia ka rukom treikam ka tnad Excise ha Jylla bad ban pynkhlain ia ka jingtreikam kaba shai bad kaba don jingkitkhlieh ha baroh ka lynti iaid ka kyiad”.
Ka thong ba kongsan eh ka kynthup “ka jingkhang lad ban rah beain sha kiwei pat ki jylla lane ka jingleh tuh, tehlakam ia ka jingpyniaid iew iaki kyiad thok, pynkut ia ka jinglait tuh ki khajna, pynkhlain ia ka enforcement, pynthikna ia ka jingbeit jingkhein ka stock bad ban iada ia ki nongthied bad ki kam khaii kiba dei hok”.
Ka Tnad ka ong ba ki don bun ki jingshakri digital bad online permit kiba la treikam mynta bad ka jingtreikam lyngba ki kor digital kam dei kaba thmu ban pynkhia ia ki retailer ba iaid kat kum ka ain hynrei ban wanrah ia ka rukom treikam kaba shai bad da ki technology kaba iaid ryngkat bad kaei kaba buh hapoh ka Ri”.
Halor ka khajna ka Tnad Excise, ka Sorkar ka ong “ka dei ka khajna kaba synniang bun eh sha ka pla tyngka ka Jylla bad kaba kyrshan ia ki jingpynlut ha ka roi ka par bad ki prokram na ka bynta ka bha ka miat u paidbah”.
Haba kren halor ka jingot ia ka jingiohnong ki retailer, ka Tnad kala pynshai ba kane ka jingpynkylla kam dei ka rai ba pynlong sohpdung ia ki retailer, hynrei ka dei shibynta ban pynbeit ryntih kaba iadei bad ka lynti iaid jong ka kyiad bad ka jingbuh dor”.
