Agartala, Risaw 7: Ka jingpynbna u nongseng ka Tipra Motha,Pradyot Kishore Manikya Debbarma, ba u thmu ban sangeh don bynta jylli saiñ hima sima, ka la pynmih ïa ka jingïakren kaba jur bha ha ka saiñpyrthei ha Tripura, wat haba ki paralok ba ïatreilang bad ka NDA, ki la kyntu ban husiar bad ki la ong ba ym pat don kano kano ka jingïakren kaba pura haduh mynta.
Ha ka jingiakren lang ka NDA ha Agartala Press Club kaba la long ha ka sngi Balang, u state general secretary ka BJP u Bipin Debbarma bad u nongïalam ba rangbah jong ka Tipra Motha u Mebar Kumar Jamatia ki la ong ba ka kynhun synrop ka dang ap ïa ka jingïakren beit beit bad u Pradyot shwa ban shim ïa ka jingpynkut halor kane ka jingpynbna jong u.
U Bipin Debbarma u la ong ba ka kynhun synrop kam shym la ioh kano kano ka jingthoh lane ka jingiehnoh kam kaba pura na u Pradyot.
“Ngi la ïohi ïa ka jingthoh jong u Pradyot ha ka social media bad ka shithi kaba pynpaw ïa ka rai shimet jong u.Kat haduh ban da ïoh ïa kano kano ka jingïakren kaba thikna, ngi kheiñ ïa kane kum ka jingpyrkhat shimet jong u,” ong u Debbarma.
U la ong ba u Pradyot u dang iai bteng ban pynneh ia ka jingiadei shimet bad ha ka kam bad u Myntri Rangbah ka Jylla u Prof. Dr. Manik Saha, u Union Home Minister u Amit Shah bad ki rangbah nongïalam ka BJP na Delhi.U la ong ruh ba ka NDA kaba synshar, kaba kynthup ïa ka BJP, Tipra Motha bad ka IPFT, ka dang neh beit bad ka angnud ban kyntiew ïa ka Tripura.
U Jamatia u la ong ba ki nongialam ka Tipra Motha kim pat don ka jingiakren beit beit bad u Pradyot halor kane ka kam.
“Ïa kane ka kam yn sa ïakren bniah ynda u la wan phai sha ka jylla”, la ong u Jamatia.
U la bynrap ruh ba u Pradyot um shym la pynduh ia ka jingiadei bad ka party ne ki paidbah.Wat lada u kynriah noh na ka kam sain pyrthei, u Jamatia u la ong, u Pradyot u la kren shai ba un iai bteng ban ieng ha ka liang jong ki paidbah bad ban sei ia ka sur jong u na ka bynta ka hok jong ka jaidbynriew Tiprasa.
Kane ka jingpynbna jong u Pradyot ka long hadien katto katne sngi ba ka NDA ka la leh bha ha ka TTAADC Village Committee elections.Ka jingpynbna jong u ka la buh jingkylli mynta halor ka rukom treikam bad jinglong nongialam jong ka Tipra Motha halor ka lawei.Ka jingjia kaba kongsan kaba hadien la khmih lynti hadien ba u Pradyot u la pynlong ia ka jingiakren bad ki nongialam bad ki nongtrei jong ka party.
