Shillong, Jymmang 29: U Myntri ka Tnad Bording Bah Metbah Lyngdoh ha ka sngi Thohdieng, ula pynpaw ba ka jingpynlip bording elektrik ha ki katto katne ki bynta jong ka jylla kadei namar kiba bun ki daw kynthup ka jingpyniaid shakhmat ia ki skhim Revamped Distribution Sector Scheme (RDSS) bad ki kam ha kaban pynpoi ia ka bording elektrik sha ki iing ki sem.
Ula ong ba kine ki jingpynlip ia ka bording kidei ki bym lah kiar na ka bynta ban pyndep ia kitei ki projek.
“Ki bun kiei kiei kiba la jia, kumta phin sa iohi ia ka jingbun ia ka jingpynlip ia ka bording elektrik hangne hangtai namar ba ki skhim bapher bapher ki dang iaid shakhmat, kum ka RDSS bad kiwei kiwei, ryngkat bad ka jingpynpoi shuh shuh ia ki bording elektrik ha ki iing ki sem” ong u Bah Lyngdoh haba iakren bad ki nongthoh khubor.
Ula ong, ba ka jingpynlip bording ka long kaba donkam namar ban pynthikna ia ka jingshngain ia kiba trei ia katei ka kam.
“Kumta kitei kiei kiei ki kam, ngi hap ban pynlip ia ka bording, na ka bynta katto katne por, ngin ym lah ban trei ia ki kam ki jam lem da ngi pynlip shwa ia ka bording elektrik” ula ong.
U Myntri ula ong, ba la dep ruh ban ai lypa ia ki jingtip sha ki bor pyniaid shnong.
“Ia ki jingtip lah ai sha ki Dorbar Shnong jong ki jaka kiban shah ktah ryngkat bad ia ka por jong ka jingpynlip ia ka bording bad la ai notis lypa khnang ba kin tip lypa shaphang katei ka jingpynlip ia ka bording” ong u Bah Lyngdoh.
Ka RDSS, kadei ka skhim kaba la bei da ka Sorkar Pdeng da ka jingthmu ban pynbha ia ka rukom ai jingshakri kaba ryntih bad ka jingpynneh ia ka ioh ka kot jong ka rukom sam ki kompani ia ka bording lyngba ki jingtei kiba la dep ban kyntiew kyrdan bad ki smart meter.
Kane ka jingkren u Bah Lyngdoh kala wan hadien ba kala don ka jingujor jong ki paitbah halor ka jingbym pynthikna ia ka por bad ka jinglip khah khah ka bording elektrik ha kylleng ki jaka bad ha kylleng ki district.
 bad ki kam ha kaban pynpoi ia ka bording elektrik sha ki iing ki sem.){kind=link}