Shillong, Jymmang 29: Ka Meghalaya Two-Wheeler Commercial Permit Holder (MTCPH) ka la ujor sha ka Deputy Commissioner (DC) ka East Khasi Hills ban pynshitom da kaba tyngeh ia ki riew shimet kiba kamai kali arshaka (bike taxi) khlem ki kot ki sla kiba biang, haba kdew ba ka jingkamai khlem ki kot ki sla ka wanrah ka jingduhnong khajna bad buh jingma ia ka jingshngain jong ki nongleit nongwan.
Ha ka shithi sha ka Deputy Commissioner, ka Kong RM Kurbah, bad Chairman jong ka Regional Transport Authority, ka MTCPH ka la ong, “bun ki riew shimet kiba treikam kum ki nongpynïaid iaki arshaka ban kamai (bike taxi) khlem da ïoh ïa ka jingbit bad jingmynjur ba donkam na ka tnat ba dei khmih”
Ka shithi ka la kdew ba ki jingkamai daki arshaka khlem jingbit ka long ka jingpynkheiñ ïa ki kyndon ba la buh hapoh ka aiñ kali, Motor Vehicle Act, 1988, Motor vehicle aggregator guidelines, 2020 bad kiweiki kyndon jong ka aiñ.
“Kum kine ki kam be-aiñ kim wanrah tang ïa ka jingduhnong ha ka khajna hynrei kaba kongsan eh ka buh jingma kaba khraw ïa ki nongleit nongwan namar ka jingbym don ka jingpynshisha kaba biang naka tnat Pulit, ka jingïada na ka Commercial Insurance bad kiwei kiwei ki jingbud ryntih ïa ki kyndon” la kdew ka jingujor.
Ka MTCPH ka la kynthoh ba ka jingbteng ban treikam jong ki riew shimet ban kamai daki arshaka khlem ki kot ki sla ka long ka jingpynkheiñ ïa ka kamai kajih jong kiwei pat kiba iaid katkum ka ain ngi bad kiba la noh synñiang ruh sha ka khajna jong ka jylla.”
Ki samla bala ioh jingbit ban kamai daki arshaka kila kyntu ïa ka ophis DC ban “shim ïa ki sienjam kiba tyngeh pyrshah ïa ki briew shimet kiba kamai khlem ka jingbit bad bthah iaki enforcement officer ban khanglad ïa kum kine ki kam be-aiñ.”
Ki la kyrpad ruh ïa ka bor District ban mang bad ithuh ïa ki jaka ieng kali (arshaka) kiba biang ha ki jaka kum ha Khyndai lad, Iewduh bad kiwei kiwei ki jaka iew kiba bun briew khnang ba ki nongleit nongwan ki ithuh iaki, lada ki donkam arshaka ban leit jingleit.
 ka la ujor sha ka Deputy Commissioner (DC) ka East Khasi Hills ban pynshitom da kaba tyngeh ia ki riew shimet kiba kamai kali arshaka (bike taxi) khlem ki kot ki sla kiba biang, haba kdew ba ka jingkamai khlem ki kot ki sla ka wanrah ka jingduhnong khajna bad buh jingma ia ka jingshngain jong ki nongleit nongwan.){kind=link}