Shillong, Jymmang 28: Ka United Democratic Party (UDP) hynne ka sngi Palei, kala pynbna paitbah ba u Nongiasaid aiñ Bah Vivanstone G Kharngapkynta un long u kyrtong ka seng ban iakhun ia ka elekshon shiteng samoi jong ka MP Lok Sabha na ka Shillong Parliamentary Constituency.
Haba pynbna ia kane ka rai ha ka jingialang paitbah jong ka seng, u President ka UDP u Bah Metbah Lyngdoh ula ong, “Nga sngew ba ka long kaba dei ia nga ban pynbna ia ka kyrteng jong u Bah Vivanstone G Kharngapkynta kum u kyrtong jong ka seng”.
Ula bynrap ba ka jingpynbna kyrtong kadei kaba la pynskhem hadien ba la pyndep ia ka jingiasyllok kaba iar bha.
“Nga dap da ka jingkmen ban pyntip sha ki nongkyrshan jong ka seng UDP bad ki nongthep vote jong ka Shillong Parliamentary Seat ba hadien jong ka jingiatai kaba sani bad kaba jrong bha, ngi lah shim ia ka rai da kawei ka jingmut ban ai jingmynjur ia ka kyrteng jong u Bah Vivanstone G Kharngapkynta kum u kyrtong ba pura jong ka seng” la ong u Bah Lyngdoh.
U Bah Vivanstone Kharngapkynta, udei u nongiasaid ain uba la ih bha ha ka kam bad ula don ruh ia ka jingiadei kaba la palat ia ka 30 snem bad ka District Council, mynta un ialam ha ka jingialap elekshon na ka bynta ka seng UDP na ka bynta ka elekshon shiteng samoi.
Haba pynpaw ia ka jingskhem jingmut halor ka elekshon shiteng samoi, u Bah Lyngdoh ba ka jingioh jingkyrshan ka seng kala kiew na ka 44,000 vote ha ka elekshon Lok Sabha ha u snem 2024 sha ka 1.45 lak ha ka elekshon kaba dang shu dep jong ka District Council.
“Hadien jong ka elekshon MP ha u 2024, ka jingioh ia ka result kala pynsngewsih kthang ia ngi baroh kum ka seng” ong u Bah Lyngdoh.
Ula ong ba katei ka jingkylla kala wan ha ka elekshon jong ka District Council.
“Mar ia wan ka elekshon MDC, ngi lah jop ha ki 5 tylli ki constituency ha ka KHADC, ngi lah jop ha ki 3 tylli ki Constituency ha JHADC, ngi lah wan baar ha ki 4 ne 5 tylli ki constituency ha KHADC bad ha JHADC ngi lah wan baar ha ki 5 ne 6 tylli ki constituency da 5,000–6,000 vote ne palat”.
“Kata kaba mut ba ka jingwanphai ki nongkyrshan na ka 44,000 ngut ha elekshon MP 2024 kala kiew sha ka 1.45 lakh tylli ki vote ha kylleng ki District Council kiba hap ha ka Shillong Parliamentary Constituency” ula bynrap.
U Bah Lyngdoh ula ong, ba kala don ka jingpynbor ia ka seng ba kadei ban kiar ha kaban iakhun ia ka elekshon shiteng samoi, hynrei ki dkhot ka seng na kylleng jong ka Khasi-Jaintia Hills kila pynbor ba dei ban iakhun beit.
“Kila don kito kiba la ong, ba na ka bynta kane ka elekshon shiteng samoi ngim dei ban pynieng kyrtong shuh. Kila don ki jingai jingmut pat hangne hangtai ba dei ban shu ai jingkyrshan noh iano iano” ula ong.
“Mynta lah ar bnai nga lah ioh pdiang ia ki ‘phone call’ na baroh ki constituency na Khasi-Jaintia Hills ba ngi dei beit ban pynieng ia u kyrtong” la ong u Bah Lyngdoh.
Ula buh jingkylli ruh ia ka rukom pyrkhat ban shu shong noh. “Nga nyngkong nga lah kylli ialade: Ha ka sngi thep vote, kum u President ka seng, iano ngan thep vote lada ngim lah ban pynieng ia u kyrtong na ka seng UDP? Kata kadei ka jingkylli”.
Ha kaba iadei bad ka jingiakhun u Bah V Kharngapkynta, u Bah Lyngdoh ula ong ba ka pyni ba kadei ka jingmynjur da ka jingiasngewthuh jingmut lang.
“Ngi dap da ka jingkmen kaba khraw ba ka kyrteng kaba ngi pynbna mynta ka sngi ba kam dei tang ka jingkwah jong u Bah Vivan ne jong ka UDP hynrei kadei da ka jingsngewthuh jingmut lang. Ka don ia ka jingiadei kaba iajan bad ka jingkwah na baroh arliang, namar lada dei tang u kyrtong uba kwah bad ka seng ka kwah lane lada ka seng ka kwah ne u kyrtong pat um kwah, kan ym ialam shano shano ruh”.
Ula ong ba une u nongiasaid aiñ, udei u nongiasaid aiñ uba la rangbah bha ha ka seng, uba la shakri kum u Special Counsel ia ka District Council la palat ia ka 30 snem.
“Ha ka politik, kane kadei ka sien kaba nyngkong kaba un rung bad ban iakhun ia ka elekshon” ong u Bah Lyngdoh.
Haba pynkynmaw ia ka jingrung ka jongu ha ka kam sain pyrthei, ula ong “Ha u snem 2007–08, Nga lah shah jied na ka Mairang Constituency ban rung sha ka seng UDP bad ha ka 2 tarik u Nohprah kila ai tiket ia nga ban iakhun ia ka elekshon. Ngam shim lah tip eiei ban kren ha ka kam sain pyrthei hynrei nga lah jop pat ia ka elekshon.
Ha kaba iadei bad ki mat jong ka seng, u Bah Lyngdoh ula ong, “Kaei kaba ngin peit kadei halor ki paid riewlum tynrai shwa. Kane kan dei ka mat kaba nyngkong eh”.
Ula bynrap ba ka thong jong ka UDP ka kynthup ban ai ia ka jingshakri kaba bha, ban ai ia ka jingsynshar ha baroh ki liang kaba mar katjuh bad ka bym shah liang.
“Nga ngeit skhem ba ki paitbah jong ka constituency kaba ngi pynieng ia u kyrtong ha ka elekshon MP kin sngewthuh ia ka jingiapher jong u kyrtong u jong ngi” ula ong.
Ha kaba iadei bad ka bynta jong u Bah Kharngapkynta khamtam ia ka kamram ha Delhi lada shah jied, u Bah Lyngdoh ula ong “Kum u nongiasaid aiñ, un leit sha Delhi. Yn ym leit tang ban shu iatai nia halor kawei ka mat. Ki don bun ki mat kiba hap ban kren ha kaba iadei bad ka kolshor, ka riti dustur ka jong ngi bad kiwei ki mat kiba iar, namar ba u dei u briew uba don ia ka jingshemphang kaba iar bha ha kaba iadei bad ki aiñ ki kanun”.
 hynne ka sngi Palei, kala pynbna paitbah ba u Nongiasaid aiñ Bah Vivanstone G Kharngapkynta un long u kyrtong ka seng ban iakhun ia ka elekshon shiteng samoi jong ka MP Lok Sabha na ka Shillong Parliamentary Constituency.){kind=link}