Shillong, Jymmang 28: U Myntri ka tnat Youth Affairs and Sports ka Sorkar Pdeng Dr Mansukh Mandaviya un wan sha Meghalaya naduh ka 29 haduh ka 31 tarik Jymmang 2026, ban bishar bniah ia ki jingtei iaki jaka ialehkai, ban leit sha ki prokram jong ki samla, bad ban bishar bniah ia ki jingpynkhreh na ka bynta ka 30th National Games.
Ha kane ka jingwan jong u Dr Mandaviya, un leit ban iashim bynta lang ha ka Chintan Shivir ba la pynlong da ka tnat Youth Affairs.
Ha kane ka sngi yn don lang ruh u Myntri barim ka tnat Youth Affairs ka jylla Meghalaya u Bah Shakliar Warjri lem bad kiwei ki heh ophisar.
Ha ka 30 tarik Jymmang, u Myntri Sorkar Pdeng un plie ia ka Integrated Multipurpose Indoor Sports Complex ha Shillong ha ryngkat ka jingdonlang u Myntri Rangbah rangbah ka jylla u Conrad K. Sangma.
Ia kane ka Integrated Multipurpose Indoor Sports Complex la tei pynheh bad pynbha ha ka jinglut kaba T.132.9 klur bad ha kane ka Sports Complex yn don ki jaka ialehkai basketball, badminton bad volleyball, nalor kiwei pat ki jingialehkai Indoor.
Ha kane ka Sports Complex yn don ruh multipurpose halls, auditorium ba pyndonkam bun jait, ki jaka ïalang bad la thmu kum ka jaka ba kongsan na ka bynta ka National Games.
Ïa ka Host State Contract na ka bynta ka 39th National Games 2026 yn ïasoi ruh bad ka Meghalaya ha ka jingdonlang riew rangbah bad ki nongmihkhmat jong ka Indian Olympic Association.
U Dr. Mandaviya un long u nongpyniaid ia ka jingialang bishar bniah na ka bynta ki jingpynkhreh kiba iadei bad ka 39th National Games 2026.
Ha ka jingialang yn kynthup ka jingiakren ha kaba ki ophisar na ka jylla Meghalaya hapdeng ki nongmihkhmat na kiwei pat ki jylla ka thain shatei lammihngi.
Kum shi bynta jong ka jingleit jurip, u Myntri Sorkar Pdeng un jurip ia ka Umsawli Sports Complex ha Shillong, kynthup ia ki jaka ialehkai Aquatics bad Tennis bad ban bishar bniah ia ki jingtei kiba dang iaid shakhmat hapoh Meghalaya.
Ha ka 31 tarik Jymmang, u Dr Mandaviya un bishar bniah ia ka jingpyntreikam bad ka jingiaid shaphrang jong ki skhim ba la kyrshan da ka Sorkar Pdeng ha Ri-Bhoi district kiba hap hapoh ka Poorvottar Sampark Setu.
Kane ka jingwan jurip ba 3 sngu jong u Myntri Sorkar Pdeng ka pyni ia ka jingbteng jong ka Sorkar India ban pynkhlain ia ka jingiadei jong ki samla, ban kyntiew ia ki jingtei iaki jaka ialehkai bad ban kyrshan ia ka roi ka par ha ka thain shatei lammihngi.
