Tura, Jymmang 21 : U Myntri Rangbah ka Jylla Conrad K Sangma ha ka sngi Palei, ula ban jur ia ka jingdonkam ka jingtrei kam jong ka Tnad Pulit kaba lamkhmat da ka technology bad ki jingmih haba iashimbynta ha ka SSP-CO’s Conference ha Tura.
Pleased to attend the SsP–COs Conference 2026 in Tura with senior officers of @MeghalayaPolice to deliberate on strengthening policing, improving coordination, and enhancing service delivery of our police force.
Reviewed key presentations and shared inputs on technology-driven,… pic.twitter.com/DBHP54KZTt
— Conrad K Sangma (@SangmaConrad) May 21, 2026
Ki Heh Pulit bad kynthup iaki Superintendent of Police bad ki Commandant jong ki Battalion kila iashimbynta ha kane ka jingialang kaba la iakren sani halor ka jingpynkylla ia ka rukom treikam hapoh ka Tnad, ka jingtehlakam ia ka ain bad ka shongsuk shongsain, bad ki jingdonkam jong ki jingtei hapoh ka Tnad Pulit.
Haba ai jingkren, u Conrad ula ong ba ka jingpynlong thikna ia ka SSP-Cos conference ka pyni ia ka jingnang janai ha ka rukom treikam ka Tnad bad ai khublei ia ka Director General of Police ba kala shimkhia ban pynthikna ba kum kane ka conference la pynlong man ka por.
“Kane ka dei ka sienjam kaba bha palat. Ha ki snem bala leit, ka jingbym don ki jingialang ba thikna kala wanrah ia ka jingbym biang kaba la ktah iaka iatreikam lang hapoh ka Tnad” ula ong.
Ula tyrwa ban pynkynriah ia ki jaka pynlong ia kane ka conference na kawei ka jaka sha kawei pat ha kylleng ki jaka jong ka Jylla, ba kynthup ha Jowai bad ha Nongstoin, ban pynshlur ia ka jingbun ki nongiashimbynta bad ka jingiadei bad ka thain.
Ha kane ka conference, la ai jingkren halor ka jingpyntreikam ia ki jingai jingmut na ka DGsP/IGsP conference u snem 2025, ka jingtehlakam ia ka ain bad ka shongsuk shongsain, ka cyber policing, ka Complaint Management System, HRMS, ki sienjam ban iakhun pyrshah ia u droks bad ka jingpynkylla ia ka Meghalaya Police Service Rules.
Ka conference kala bishar kam ruh halor ka jingpyntreikam ia ki 124 tylli ki jingai jingmut ba iadei bad ka jingtreikam ki Pulit bad ka jingshngain ha Jylla, haba iakren sani ruh halor ka jingpynkhlain ia ka SMART policing lyngba ka jingpyniasoh bad ka technology bad jingai jingshakri kaba kham bha.
U Conrad ula bthah ia ki Heh Pulit ba kin lum lang ia baroh ki jingkren hapoh ka conference bad ban phah sha ka Ophis jong u ba un ioh khmih bniah. Ula ai jingmut ruh ban pynlong ia ka jingialang bishar kam ba kynthup ia ka Ophis u Myntri Rangbah, ka Tnad kam Pohiing, ka DGP bad u Myntri ba dei khmih ban lah pyntreikam ia ki jingtyrwa bala wanrah ha ka por kaba biang.
Haba ban jur ba ka kam pulit ka dei ban pynleit jingmut bha ha ka jingshngain ki paidbah bad pynduna ia ki kam bymman, u Myntri Rangbah ula ong ba ia ki jingjop yn dei ban thew tang na ka jingthungkam lane ka jingpynbun ia ki jingtei.
“Ka jingthung ia 3900 ngut ki Pulit kam dei ka jingjop. Ka jingjop ba shiha hi ka long la ngi la lah ban pynduna ia ki kam bymman, katno ngi la lah ban iada ia ka jingim ki briew, ba haduh katno ka jingshngain ki paidbah” ula ong.
Ula kren ruh halor ka jingkongsan ka jingbteng ia ki jinghikai ha ka jinglum khubor, ka akor ka burom, ka jingtehlakam ia ka ain bad ka shongsuk shongsan bad ka jingpyntreikam ia ki technology, haba ai jingmut ban phah ia ki Ophisar ka Jylla sha kiwei pat ki Jylla kum sha Mumbai bad Delhi ba kin ioh jinghikai na ka rukom treikai ba janai bha jong ki Pulit.
