Ther tyngeh ka NESO ba sngap jar ka Sorkar Pdeng halor ka jingkynad Manipur | Dawa pynlait ia kiba shah rahbor

Shillong, Jymmang 21 : Ka North East Students’ Organisation (NESO) ha ka sngi Palei kala pynpaw ia ka jingsngewkhia kaba jur halor ka jingiai bteng ka jingiakynad hapdeng ki Kuki bad ki Naga ha Manipur, haba pynrem ia ki jingthombor ia ki riew paidbah bad buh jingkylli ia kaei kaba ka khot ka “jingbym leh eiei bad kynnoh ai ding pynban’ jong ka Sorkar Pdeng ha kane ka jingiakynad ba kan neh slem.

Ia kane ka rai la shim ha ka jingialang kaba la pynlong ha Guwahati bad kaba la pynlong da ka All Assam Students’ Union (AASU).

Ka NESO ka ong ba ki jingiai jia ki jinghiar thma kynsan (ambush), ki jingpyniap, ki jingrahbor bad ki jingpyntieng pynsmiej ia ki nongshongshnong ba lui lui kala wanrah ia ka jinglong jingman kaba sheptieng, ka jingsngew shngain bad ka jingbym shongsuk ha ka thain baroh kawei.

Ha ka kyrwoh, u Chairman ka NESO Bah Samuel B Jyrwa ula pynrem jur ia ka jingiai jia ki kam pyniap bad jingthombor ia ki nongshongshnong ba lui lui, kynthup ki nongialam niam haba bynrap ba “ki jingthombor pyrshah ia ki nongshongshnong ba lui lui bad ba khlem tiar, kiba don ha ka kam ban wanrah jingsuk ka dei kaei kaei ka bym lah ban pynksan”.

Ka NESO kala kyntu jur ruh na ka bynta ka “jingpynlait noh khlem kyndon ia baroh ki briew ba shah rahbor kiba la set jubor” haba kyrpad ba “ymdei ban pynmong pynmynsaw ia ki”.

Haba phai sha ka bynta jong ka Sorkar Pdeng,u Bah Samuel ula ong ba ka NESO “ka pynpaw ia ka jingpynrem kaba jur eh bad buh kylli ia ka bynta jong ka Sorbar India halor ka jingbym leh eiei bad kynnoh aiding pynban ha kane ka jingiakynad bala neh slem, kaba la iai bteng ban shim ia ka jingim jong ki lui lui bad pynthut iaka thain”.

Ka kyrwoh ka pynpaw ba bun ki briew la pyntip ba kila jah bad ym shym lapdien shuh naduh ba jia ki jingthombor bad dawa ia ka Sorkar ba kan shim ia baroh ki sienjam kiba thikna ban lah lapdien shano ba ki don.

Ka jingialang kala wai da ka jingkyrpad ia baroh ki Jaidbynriew bad ki kynhun ba don bynta ba kin kyntait ia ki kam thombor bad pynphai mar kylliang, hynrei ban iatreilang noh na ka bynta ban wanrah ia ka jingsuk, ka jingbishar hok bad ka jingwanrah biang ia ka jinglong jingman kaba jai jai ha Manipur.

Kiba la iashimbynta ha kane ka jingialang ki kynthup ia ki nongmihkhmat na ka All Manipur Students’ Union (AMSU), AASU, All Arunachal Pradesh Students’ Union (AAPSU), Khasi Students’ Union (KSU), Mizo Zirlai Pawl (MZP), Garo Students’ Union (GSU) bad ka Naga Students’ Federation (NSF).