Shillong, Jymmang 20: Khatsan ngut ki nongpang jong ka New Hope De-addiction Centre (Shynrang), Mawdiangdiang, hynne ka sngi Balang, kila ioh pdiang ia ki sertiphiket hadien ba kila pyndep ia ka jingioh jinghikai kaba shi bnai halor ka Basic Wood Technician Furniture Course, kaba dei ka jingshimkhia jongka Drug Reduction, Elimination and Action Mission (DREAM) Meghalaya ban tei ia ka jingioh kamai hadien ba la mih na ki Rehab ban kyrshan ia ki briew kiba la kylla bad ieh ia ki jingdih kiba sniew.
“Kane ka jingthmu ka long ban pynkupbor ïa ki riewshimet da ki sap ban kamai kajih, ban pynsuk ïa ka jingpynïasoh biang ïa ki bad ka imlang sahlang da ka burom, ka jingdon iaka thong bad ka jingshaniah ialade,” la ong u Director ka DREAM, u Bah Francis Kharshiing.
Ban pynthikna ba ki sama pule kiba la pyndep ia ka jingpule ha ki College kin lah ban sdang noh mardor ia ki kam bad ka Mission kan pynbiang ia ki tiar treikam hadien ba kila mih na ka jaka ioh jingsumar.
“Ki nongpang kiba la koit kin sa ioh ia ki tiar ki tar ban sdang ia ki kam ki jongki ban trei ia ki kam ban shna jingshna da ki dieng, khnang ba kin lah ban trei shimet ia ki kam bad ban kamai jakpoh” ula ong.
U Director ula bynrap, “Ba kane ka sienjam ka long ban pynthikna ba kin ym donkam ban leit wad jingïarap ne jingkyrshan pisa na shabar ban ioh thied ia ki tiar ki tar, hynrei ban pynkupbor pura ia ki da ka kabu kaba iaineh bad kaba don burom ban shaniah ialade”.
Kine ki jingai jinghikai kidei kiba la iatreilang bad ka Meghalaya State Skills Development Society (MSSDS) hadien ba la pyndep ia ka jingïasoi ïa ka Memorandum of Understanding (MoU) ha kaba sdang jong une u snem.
“Hapoh jong kane ka jingïatreilang, ka MSSDS kan plie lad na ka bynta ban pynlong ia ki prokram ai jinghikai pyntbit na ka bynta ki nongpang kiba dang don ha ki Rehab ha ki jaka ki bapher bapher jong ka jylla Meghalaya” la ong u Director.
“Kine ki jingai jinghikai kidei shi bynta jong ka jingai jinghikai ka baar snem ban pyntbit bad ban saindur ia ka sap ka phong. Ki nongpang kin ioh pdiang ia ki jinghikai bad ki sap pyntbit bad ia ki buit treikam da ka jingthmu ba kin kyntiew ia ka lad ban iohkam bad ba ka jingmih ka jongki na ki Rehab kan long ha ka rukom kaba bha bad kaba seisoh” ula ong.
Haba pynïasoh ïa ki sap ka phong bad ka jingkoit jingkhiah, u Bah Kharshiing ula ong, “Kane ka sienjam ka pyni ia ka jingiohi jngai jongka mishon treikam ka DREAM ban pynkhlain ia ki por jong ka jingshah sumar bad ban pynduna ia ka jingma jongka jingkhie pang biang, da kaba thaw ia ki lad bad ia ki kabu ban don bynta ha ki kam kiba don jingmut, ban ym shaniah ha kiwei ha kamai kajih bad ka jingpyniadei bad kiwei kiwei ha ka imlang sahlang”.
“Da kaba pynkup bor ïa ki briew kiba la koit ka khiah ryngkat bad ki sap ban kamai jakpoh, ka mishon ka don ia ka jingthmu ban pynthikna ban tei biang ia ka jingim bad ban pynlong ia ki kiba bit ba biang ha kaban noh synniang sha ka koit ka khiah bad ban pynlong ia ka Meghalaya kaba khlain” ula bynrap.
U Director ula pynskhem biang ïa ka jingkitkhlieh na ka bynta ban pyniar ia kitei ki sienjam ha kylleng jong ka jylla bad ban iatreilang bad kiwei pat ki kynhun ban pynbiang ia ki jaka sumar kiba salonsar bad ban kyrshan ia ka jingkoit jingkhiah na ka bynta ki riewshimet kiba la shah ktah na ka jingngop ha ki jingdih kiba sniew.
, Mawdiangdiang, hynne ka sngi Balang, kila ioh pdiang ia ki sertiphiket hadien ba kila pyndep ia ka jingioh jinghikai kaba shi bnai halor ka Basic Wood Technician Furniture Course, kaba dei ka jingshimkhia jongka Drug Reduction, Elimination and Action Mission (DREAM) Meghalaya ban tei ia ka jingioh kamai hadien ba la mih na ki Rehab ban kyrshan ia ki briew kiba la kylla bad ieh ia ki jingdih kiba sniew.){kind=link}