Kyntu u Bah Wailad ia ka ain ba tyngeh na ka Sorkar Pdeng halor ka jinglait tuh ki jingkylli NEET-UG

Shillong, Jymmang 19: U Myntri ka koit ka khiah Bah Wailadmiki Shylla u la dawa na ka Sorkar Pdeng ban wanrah ia ki ain kiba khlain ban pynthikna ba eksam National Eligibility cum Entrance Test (NEET-UG) bad kiwei kiwei ki eksamin ki dei ban long kiba iaid beit iaid ryntih haba kynthoh ba ka jingleh bymsuidniew jong ka National Testing Agency (NTA) kala wanrah ka jingartatien hapdeng ki khynnah pule bad bad kmie kpa iaka NTA.

Kane ka jingkynthoh kala mih hadien ba ka NTA kala rai ban pyndam ia ka eksam NEET-UG 2026 kaba la long ha ka 3 tarik Jymmang namar ka jingkynnoh laittuh ki jingkylli bad ka jingsuba ba leh bakla

“Kane kam dei tang ha Meghalaya, ka ktah ruh ia kiwei ki jylla jong ka Ri, ka long kaba sngewsih haduh katta katta namar ngim ju khmih lynti satia ia kane” ong u Bah Wailad.
U Myntri u la pynrem ia ki jingjia ba dang shen kiba iadei bad ki eksamin ba la pynlong da ka NTA bad u la dawa naka Sorkar Pdeng ban leh eiei mardor. “Namar ba ia kane la leh da ka National Testing Agency, nga pynrem shisha ia kane. Ngan kyntu ia ka Sorkar Pdeng ba kan leh ei ei” u la ong.

U la kdew ia ki jingkular ba la ai da u Myntri ka tnat pule puthi jong ka Sorkar Pdeng. “Khyndiat sngi mynshwa u Myntri ka tnad pule puthi ka Sorkar Pdeng ula kren shai ba nangne shakhmat ka Sorkar kan sa leh da kaba tyngeh bad kin sa peit ba kine ki jait kam kin nym jia shuh nangne shakhmat”, la ong.

Haba dawa daki sienjam ba tyngeh, ula ong “Ka Sorkar Pdeng pdeng ka hap ban leh eiei eiei na ka bynta ban ïoh ïa ka jingshaniah jong ki paidbah namar kane ka la ju jia wat ha ki por ba la dep. Haba jia kum kine ki jait jingjia, ka pynduh mynsiem shisha ïa ki samla pule kiba thmu iakhun eksamin bad kumjuh ruh ïa ki kmie ki kpa.”

U Bah Wailad u la kyrpad ia ki samla pule ba kim dei ban duh jingkyrmen hadien ki shah jingpynthut ka eksamin. “Kaba sngewsih ka long ba kane kam dei ka sien kaba nyngkong ba kan jia, ngan kyntu ïa ki samla pule ba kim dei ban sngewduh mynsiem. Ka NTA kala shim khia bad nga tharai kala dep pynbna ïa ki tarik ba thymmai.” ula ong.

Katkum ka jingong u Myntri, ki don bun ngut ki samla pule na Meghalaya kiba thmu ban iakhun iaka eksamin NEET.

U Myntri u la ong ba ka NTA kala buh ia ka tarik thymmai na ka bynta ka eksam NEET-UG. “Ka tarik ba thymmai ba la buh, lada ngam bakla, ka dei ha ka 21 tarik Jylliew” u la ong.