Guwahati, Jymmang 16: Ki pulit na Maharashtra Nagpur Rural District ki la kem ïa uwei u khynnah uba dang rit ka rta hadien ka jingkhynra kaba 12 sngi ha kylleng ka Assam bad Nagaland ha kaba ïadei bad ka jingjia jong ka jingleh kam kynshleiñ lyngba ka Online, la ïathuh ki heh ophisar ha ka sngi Thohdieng.
Ia kane ka mukotduma la rejistar ha ka 23 tarik u Kyllalyngkot hadien ba kawei ka khynnah kynthei kaba dang rit ka rta ka la leit sha thanad da kaba kynnoh ba uwei u briew bym lah ban ithuh u la phah ia ki message khlem akor bad ki jingbyrngem lyngba ka WhatsApp da kaba pyndonkam bun tylli ki mobile number.
Da kaba pynshong nongrim halor kane ka jingujor, ki pulit ki la register ïa ka mukotduma katkum ki kyndon ba ïadei jong ka Bharatiya Nyaya Sanhita (BNS) bad ka aiñ Protection of Children from Sexual Offences (POCSO) Act, 2012.
Ki heh ophisar kila ïathuh ba ki nongtohkit ryngkat bad ka Cyber Police Station jong ka Nagpur Rural kila pynlong ïa ka Technical Analysis ïa ki jingïakren ha ka WhatsApp, ki Call Record bad ki Digital Footprints ban lap ïa ki nongshah kynnoh.
Ka jingtohkit hadien ka la lam ia ki pulit sha ki jaka ha Assam bad Nagaland, kaba la pynlong ia ka jingkhynra hapdeng ki jylla hapoh ka jingpeit jong u Superintendent of Police u Harssh A. Poddar, u Additional SP Anil Mhaske bad u SDPO Parag Pote.
Hadien kata la phah ïa ka kynhun pulit sha Assam, ha kaba la wad bad kem ïa u nongshah kynnoh da ka jingïarap jong ki pulit hadien ba la talasi ha ki jaka lum kiba eh, la ïathuh ki heh sorkar.
Ha ka jingtohkit ki pulit ki la lap ba u nongshah kynnoh ruh u dei u khynnah rit.Ia une u nongshah kynnoh la wanrah sha Nagpur bad yn pyni hakhmat ka Juvenile Justice Board, la bynrap ki heh sorkar.
