Shillong, Jymmang 15: Ki seng sain pyrthei ha ka sngi Thohdieng kila pynpaw ia ka mat halor ka jingdon ar kyrteng ki nongthep vote, ka jingwan kiba nabar bad ka jingpynrung kyrteng ha ki thain khappud ha ka jingialang kaba la lum da u Chief Electoral Officer na ka bynta ban sdang ia ka Special Intensive Revision (SIR) jong ka Electoral Roll.
U Vice President ka United Democratic Party Bah Allantry F Dkhar ula ong, ba ka seng kala pan jingpynshai halor kane ka SIR, kaba la leh khatduh ha u snem 2005.
“Ngi don ia ka jingsngewkhia halor ki kyndon bad ka rukom pyntreikam is ka special intensive revision (SIR). Ia kane la leh lah slem bha ha u snem 2005. Kane kadei ka sien kaba khtaduh eh. Kumta u CEO bad ka kynhun jongu kila long kiba kloi ha kaban pynsngewthuh ia ki rukom kaban leh hapoh ka jylla Meghalaya,” ong u Bah Dkhar hadien ba la wai ka jingialang.
Ula ong ba ka mat kaba sngewkhia bha ka seng UDP kadei ka jingdon ki nongthep vote ha ki jaka kiba don ka jingiakajia pud.
“Ka jingsngewkhia kaba hakhmat eh ka jong ngi kadei ka thain khappud bad ha ki katto katne ki jaka khamtam ia ka mat jongka jingpynrung kyrteng arsien ha kylleng ki jylla bad kumjuh ruh ki briew kiba shu wan rungtuh nabar kiba la ioh rieh tngen ha ki bynta jong ka jylla jong ngi,” ula ong.
U Bah Dkhar ula bynrap ba ka ophis jong ka Election kala shimkhia ia kine ki jingkhuslai kiba kila pynsngew.
“Ka kynhun jong ka tnad Election ka jylla kala pynthikna ia ngi bad kala pyni ruh ia ngi da ka jingbatai kaba bniah lyngba ka “Presentation” ba baroh kiei kiei kidei kiba la leh ban pynthikna ba kin ym don satia ki nongthep vote kiba don jingsuba. Kim don kino kino ki nongthep vote ki bym dei ki nongshong shnong jong ka jylla” ula ong.
Halor ki sienjam kiban sa shim da ka seng, ula ong, “La pynbeit ia ka por bad ngin sa khmih bniah bha kumno la pyniaid ia ki kam ki jam ha kaba yn sa thung ia ki Booth Level Agent (BLA) na ki seng sain pyrthei ki jong ngi bad nga ngeit ba kane ka rukom leh hapoh Meghalaya kan pynurlong ia ka jingthmu ban don ia ki nongthep vote kiba thikna ha ka thup kyrteng ki nongthep vote ne Electoral Roll”.
U Nongialam ka NPP uba la iashimbynta ha kane ka jingialang, ula ong ba ka seng kala buh jingkylli halor ka jingpdiang ia ki kot ki sla. “Kila pynshai ha ngi shaphang ka SIR bad kiei kiei kiba donkam, ki kot ki sla aiu kiba donkam” la ong une u nongialam.
“Ngi lah pynpaw ia ki katto katne ki mat na ka seng, ngi sngewkhia bad ki rukom ai ia ki kot ki sla ne syrnod da ki bor khmih ia ki shnong, ia kaba la ioh ia ka jingpynshai na u CEO ba kim ju pdiang ia ki kot ki sla kiba ai da ki Rangbah Shnong hynrei ki kot ki sla kum ka ST, kila phah sha Delhi bad sha ka Sorkar Pdeng bad u CEO u dang ap ban ioh ia ka jubab” la ong u Nongialam ka NPP.
“Kumba ngi la ioh ia ka jingbatai ba ka long kumtei hi” ula bynrap ia ka jingbym ai jingithuh ka ECI ia ki kot ki sla bad ki syrnod kiba ai da ki Rangbah Shnong.
 jong ka Electoral Roll.){kind=link}