Shillong, Jymmang 14: Ka Meghalaya kala kynjoh sha uwei pat u mawmer ha kaban iada na ka jingpang Cancer bad ka koit ka khiah ki longkmie, da ka jingseisoh ha kaban pynlong nyngkong eh ha ka jylla ia ka HPV-ba iadei bad ka Cervical Pre-Cancer Treatment lyngba ka Thermal Ablation ha ka hospital sorkar.
Ia kane ka rukom ai jingsumar la leh ha ka 13 tarik u Jymmang ha DAE Cancer Wing jongka Civil Hospital Shillong, ia kaba ki heh ophisar ka koit ka khiah kila ong, ba kadei ka khyllipmat ha ka histori ka Meghalaya ban iakhun pyrshah ia ka Cervical Cancer.
Ia kane ka jingsumar la leh da ki Doctor bad ki Nurse ryngkat bad ka kynhun jongka Meghalaya Mission Cancer Prevention and Early Detection Project ha Civil Hospital, Shillong. Ki ophisar kila ong, ba kane ka jingseisoh ka pyni ia ka jingkiew shaphrang ha kaban pynkhlain ia ka jingshakri ban iada na ka Cervical Cancer hapoh ka jaka ai jingsumar ha jylla Meghalaya.
Ka HPV kadei ka Human Papillomavirus Infection.
Ka nongpang hadien ka jingshah khmih bniah la lap ba ka la don ia ka HPV DNA Genotype 11 ha ka 31 tarik u Lber 2026. Hadien ba la iai khmih bad tohkit bniah, iasyllok, ka nongpang kala mynjur ban leh ia ka jingsumar da ka Thermal Ablation ha ka 13 tarik u Jymmang.
Ki ophisar kila ong, ba namar ka jingshimkhia mardor, ka pyni ruh ia ka jingkiew ka sorkar jylla ha kaba iadei bad ki jaka ai jingsumar ban lap mardor ia ki jingpang bad ban ai jingsumar ia ki HPV-related Cervical Lesions bad kumta kane kala lah ban iada na ka jingkylla sha ka Cervical Cancer.
Hashwa jong kane ka sienjam, kum kine ki rukom ai jingsumar kim shim la don satia ha ki hospital sorkar ha Meghalaya. Ka sorkar mynta kala rai ban buh ia ki tiar bad ki kor ki bor Thermal Ablation ha baroh ki District Maternal and Child Health (MCH) hospital ban sumar ia ka Cervical pre-cancerous lesions.
Da kaba ong, ba katei ka jingleh kadei ka jingiaid shaphrang ha ka jingiakhun pyrshah ia ka Cervical Cancer,” ki ophisar kila ong, ba kane ka jingjop ka pyni bun ban ia ka jingpyndep pura ia ka rukom ai jingsumar. Kadei ka dak ka shin jong ka lynnong kaba thymmai ha Meghalaya ha ka jingpyrshang ban ai ia ka lad sumar, jingsumar kaba kot bor bad ka jingbiang ha kaban iada ia ka cancer ia ki longkmie ha kylleng ki bynta jong ka jylla.
Kane ka jingjop ha ka jingsdang ia ka Thermal Ablation ha ka hospital sorkar, kadei kaba la khmih lynti ba kan plie lad ban pyniar ia ka jingpyntreikam ia ka HPV Screening bad ka jingai jingshakri ha ka rukom ai jingsumar, ban ai jinghikai pyntbit ia ki nongsumar, ban pyniar ia ka jingshakri ha ki hospital ha ki district bad ki centre bad ban kyntiew ia ka jingai jingpynsngewthuh bad ban iashimbynta ha ka Cervical Cancer Screening Programme.
Ki ophisar kila ong, ruh ba kane ka jingjop ka ieng kum ka kyrwoh jong ka jingkyrmen bad ka jingiaid shaphrang bad ka bynrap ba ka Meghalaya ka dang jam shaphrang sha ka lawei ha kaba ia ka Cervical Cancer lah ban lap kloi noh, ban sumar mardor bad ban ialeh ban iada lyngba ka jingiashimbynta lang jong baroh bad ka jingioh ia ka lad sumar ha ka jylla baroh kawei.
