Kohima, Nailur 14: Ka Railway Protection Force (RPF) ka la pyllait im ia arngut ki khynnah shynrang kiba dang 17 snem ka rta na Nagaland kiba la lap ba ki sahkut ha kawei ka jaka khlaw kaba jngai hajan ka lynti rel ha ka shnong Ammor kaba don hajan Katpadi ha Tamil Nadu ha ka Sngi u Blei.
La iathuh ba kitei ki samla, ki la mih na la iing khlem da pyntip sha kiba ha iing ha sem bad kiba thmu leit wad kam sha Kerala.
Katkum ki heh ophisar, ki bahaïing jong ki ki la sngewthuh ba ki khynnah shynrang ki la leit noh hadien ba ki la lap ba ki la lum ïa ki tiar ki tar jong ki.Ki Pulit ka Nagaland hadien ki la buddien ïa ka jingleit jingwan jong ki bad ki la lap ba ki la kiew rel ban leit sha Kerala.
Ka leit ka wan jong ki, ka la thut noh ha Samalkot Railway Station, kaba don hajan Kakinada ha Andhra Pradesh, ha kaba ki la hiar khyndiat por bad ki la duh noh ia ka rel.
Nangta ki khynnah shynrang ki la thied tiket thymmai bad ki la kiew da ka Gurudev Express ban leit sha Thiruvananthapuram.
Hynrei la iathuh ba ki la sngew khuslai ha ka jingleit, ki la duh ia ki jingkit bad ki la hiar hajan ka Katpadi.Hadien ki la iaid kai sha kawei ka jaka kaba don khlaw hajan ki lynti rel.
Hadien ba ki mobile jong ki ki la switch off, kine ki khynnah ki la lah ban charge biang tang khyndiat por ia kawei bad kila phone ia kiba ha iing ha sem jong ki, da kaba pyntip ba ki la jah.
Ki bahaïing hasem jong ki, ki la pyntip sha ki pulit jong ka Nagaland, kiba la pyntip ïa ki jingtip ba bniah jong ka rel bad ka jaka ba la tip khatduh sha ki pulit RPF jong ka Katpadi.
Wat hapdeng ka jinghap slap kaba jur ha ka miet 12 bad 13 tarik u Nailur, ka kynhun pahara jong ka RPF ba la ialam da u ASI P.R. Murali bad u Head Constable u G. Gopalakrishnan ki la pynlong ia ka jingwad bad lap ia kitei ki samla ha katei ka khlaw ha ka Sngi u Blei.
Baroh arngut ki khynnah shynrang la lap ha ryngkat ka koit ki khiah.La pynbiang ia ki da ka bam, ki jain ki neb kiba khuid bad ka jingphah peit bniah ia ka koit ka khiah.
Hadien kata ka RPF ka la pyntip sha ka Child Welfare Committee bad ki la aiti ïa kine ki samla sha ka Child Helpline ban sumar bha ïa ki ha Vellore Collectorate.Mynta la pynbeit ban pynïakynduh biang ïa ki bad kiba haïing hasem ha Nagaland.
