Senapati, Nailur 14: Ka jingkulmar ba thymmai ka la kyan biang ha ki lai tylli ki district jong ka jylla Manipur ha ka Sngi u Blei, ha kaba lai ngut ki briew ki la iap bad katto katne ngut kiwei pat ki la mynsaw, katba ki iing jong ki jaidbynriew Rongmei Naga ki la shah thang ha Jiribam.
Kane ki jingjia la iathuh ha ka 13 tarik u Nailur, kaba iadei bad ka jingrakhe jong ka jaitbynriew Kuki ia ka Sahnit Ni (Black Day).
Ka jingjia kaba nyngkong ka la jia ha ka por kumba 4 baje eiei mynstep ha ka shnong Tollen Kuki kaba hap hapoh ka Tousem subdivision jong ka Tamenglong District, hajan ka NH-37, kaba pyniasoh ia ka Imphal bad ka Jiribam.
Katkum ki pulit, ki suba lehnoh ki la siat naphang ia kawei ka longiing ha iing sah jong ki.Kawei ka longkmie kaba la tip kyrteng kum ka Lhinghangai Singsit ba la ju khot sin Lhingngai ka la khlad noh ha katei ka jingshah thombor, katba u kurim jong ka, u Seineh Singsit bad u khunlung jong ki, ki la mynsaw na ki jingshah siat.
Ki bor pahara ki la leit mar mar sha katei ka shnong hadien katei ka jingjia bad ki la ai jingiarap ia kiba mynsaw.Ka bor shnong Kaimai ka la pynrem jur ia katei ka jingshah thombor, da kaba batai ba ka dei ka jingthmu kaba thmu ban pynmih ia ka jingkulmar bad ban pynthut ia ka jingiadei hapdeng ki ar jaitbynriew.
Ka jingshah hiar thma kaba ar pat ka dei ha ka por kumba 3.20 janmiet ha ka shnong Longpi Kuki kaba don ha Noney district.La kynnoh ba ki don arngut ki briew kiba la tip kyrteng kum u Thangvel Gangte bad ka Julie Gangte kiba shong ba sah ha ka shnong Sempat.Katba kawei pat ka longkmie ka la jah rngai.
Na kine ki ar tylli ki jingjia ki la pynlong ïa lai ngut kiba la pynthikna ba ki la khlad hapdeng ki nongshong shnong jong ka Kuki, ha kaba lai ngut kiwei pat, kynthup ïa uwei u khyllung, ki la mynsaw ne jah rngai.
Halor kane, ka Kuki Inpi Jiri, Tamenglong bad Noney (JTN) ki la pynbna da ka pakhang khang dam kaba 24 kynta kum ka jingpyrshah ia ki jingthombor.
Hadien kata, ha ka por janmiet, ha ka por kumba 6.30 janmiet, la kynnoh ba ki la shah thang lai tylli ki iing kiba dei jong ka jaitbynriew Rongmei Naga ha ka shnong Khedaghar kaba don ha Jiribam Police Station, kaba jngai kumba 12 km ei ei shaphang shatei jong ka sor Jiribam, kumba 12 km eiei na ka sor Jiribam, ong ka khubor.
Ki jingjia bad ki nongleh kam sniew kiba don ha lyndet jong katei ka jingjia thang iing ym shym la lah ban tip satia.
Ka jingshah thombor ha kane ka sngi ka la pynthymmai ïa ki jingsngewkhia halor ka lynti ïaid Jiribam-Tamenglong-Noney, ka jaka kaba sngewkhia bad kaba don ki jaitbynriew bapher bapher kaba la sakhi ïa ki jingshah thombor ba ju jia man ka por naduh u snem 2023.
Watla la pynmih ïa ki jingkynnoh ha kaba ïadei bad ka jingdonkti jong ki kynhun lehnoh ha ka jingshah thombor, hynrei ïa kine ki jingkynnoh ym shym la pynshisha da ki bor pahara.La buh ia ki bor pahara ha ki jaka ba shah ktah bad ki dang buddien ia ka jinglong jingman ban iada na ka jingjur shuh shuh.
