Shillong, Nailur 14 : Ka Tournament Committee ka Shillong Sports Association kaba shong jingialang hynne ka janmiet sngi Nyngkong, ka la rai ban dain kuna ia ka Shillong Lajong FC namar ka jingsei haduh lai ngut ki rang ialehkai ki bym dei na Meghalaya, kaba la iaid lait ia ka kyndon ialehkai bala buh.
Ka Shillong Lajong FC kala sei haduh lai ngut ki player bym dei na Meghalaya ha ka jingiakhun pyrshah ia ka Sawmer SC ha ka jingiakhun ba long ha ka sngi Saitjain ha SSA Stadium.
Da kane ka rai, ka Shillong Lajong FC kaba la jop haduh 6-1 kol ia ka Sawmer SC, kala shah dain kuna bad la khein rem noh ia ka namar ka jingsei tam ia ki rang ialehkai ki bym dei na Meghalaya ha ka jingiakhun.
Ka Sawmer SC kala ujor ia kane (protest) sha ka SSA, bad ka Tournament Committee ka la khot lang ia ki dkhot ka Lajong bad Sawmer, bad shim ia ka rai ba ka Lajong kan duh ei ia ka jingjop bad ka 3 point kan leit noh sha ka kynhun ialehkai ka Sawmer.
Kane ka kuna ia ka Shillong Lajong ka jia long hadien ba la lap bad shem ba ka la pynkhein ia ka kyndon pyniaid ba 9, kaba la dep ban sam iar sha baroh ki klob ne team ba iakhun ha ka SPL ha ka 8 tarik u Naitung jong u snem 2025.
Kat kum katei ka kyndon, la shah ia ki team ne klob ba ki lah ban pynialehkai ne pynmih madan tang 2 ngut duh ki rang ialehkai bym dei ki nong Meghalaya, hynrei, ha ka jingbakla, ka Lajong ka la kum sei madan haduh lai ngut.
Kat kum ka thup ialehkai, u Lakpa Lama ula rung sha ka thup ialehkai First XI, bad ki arngut kiba la pynmih bujli pat (substitute) ki long u Lalmuansanga bad u Abelson Jachi.
