Pynkut noh ia ka jingeh ba palat 10 snem | Kwah ki nongtih dewiong ban iatreilang ka Sorkar Jylla bad Sorkar Pdeng ha ka kam tih dewiong

Pynksan ia ka jingithuh ka Supreme Court ia ka hok longtrai ki riewlum ka Jylla ia ki marpoh khyndew

Shillong, Jymmang 14 : Ka Jaintia Coal Owners, Miners, Suppliers & Workers Association (JCOMSWA) ka la kyrpad ïa ka sorkar Meghalaya ban shim ïa ki sienjam ban ïatrei lang bad ki Autonomous District Council lem bad ka Sorkar India ban plie ïa ki “lad kiba ïaid kat kum ka aiñ na ka bynta ka jingtih dewïong da ka kyndon, ka jingtih ba shngain, bad ka jingtih ryngkat ka jingkitkhlieh ia ka mariang da ki trai jaka kiba dei ki riewlum” ka East bad West Jaintia Hills.

Ha ka dorkhas sha u Myntri Rangbah Conrad K Sangma ha ka sngi Palei, ka seng ka la kdew ïa ka jingithuh jong ka Iingkashari Supreme Court ïa ka hok ki riewlum halor ki marpoh khyndew kum ka nongrim jong ka aiñ ban pynbeit ïa ka jingeh kaba la kot palat 10 snem halor ka kam tih dewïong ha ka jylla.

“Ngi ngeit, bad la ai jingmut ïa ngi, ba ka Riti Synshar ka ri India bad ka rukom treikam jong ki aiñ kiba don lypa ki don ha ki ïa ki tiar kiba donkam ban pynbeit ïa kane ka jingeh,” ong ka JCOMSWA.

“Ka jingithuh da ka Iingkashari Supreme Court jong ka India ba ki riewlum ka Meghalaya ki longtrai ia ki marpoh khyndew kiba don hapoh ka khyndew jong ki, ka long ka nongrim ha kaba lah ban tei ïa ka jingpynbeit kaba hok bad kaba ïaid kat kum ka aiñ.”

Ka kynhun ka ong ba ka jingsahkut ka kam naduh ka jingkhang tih dewiong ka National Green Tribunal ha u 2014 ka la buh ïa ki trai jaka riewlum ka ri-lum Jaintia ha ka jingsngewduh jingkyrmen kaba jar jar.

Kat kum ka dorkhas, ki longïing “ki dei ki trai jong kaei kaba don hapoh ki kjat jong ki da ka jingai-ei jong ki kpa tymmen jong ki bad ka jingithuh jong ka Riti Synshar jong ka India, bad kiba ym lah pat ban pyndonkam ïa ka na ka bynta ka jingbha jong ki longïing bad ki shnong ki thaw jong ki.”

Ka JCOMSWA ka la pynshai ba kam dawa ban phai dien biang sha ka ei kaba ju leh mynshuwa.

“Ngim shym la dawa ban phai biang sha ka jingtih pathar ba khlem kyndon, kaba don jingma, bad ka jingtih thliew khnai ba long pathar khlem da pyrkhat ïa ka mariang ba ju leh mynshuwa. Ngim shym dawa ban gin iaid lait ïa ka aiñ,” ong ka dorkhas. Hynrei, la kyrpad ïa ka jylla ban ialam bakhmat ha kaban wanrah ia ka jingiatreilang jong ki bor treikam.

“Kaei kaba donkam ka long ka mon ban leh lyngba ka sain pyrthei ba kin pyndonkam ia kito ki atiar bad ka jingkut jingmut jong ki bor treikam ban ïatrei lang hapdeng ka Sorkar Meghalaya, ki Autonomous District Council, bad ka Sorkar India,” thoh ka seng.

Ka pynpaw ruh ba ka JCOMSWA ka long kaba kloi ban iarap ia ka Ophis u Myntri Rangbah da ki jingtip lane ki jingiasyllok.