Shillong, Jymmang 12: Namar ka jingkiew ka jingbym iohkam iohjam bad ka jingkynnoh ia ka jingleh Benami, ka Federation of Khasi-Jaintia and Garo People (FKJGP) Sohra Circle hynne ka sngi Baar, kala kyntu ia ka Khasi Hills Autonomous District Council (KHADC) ban pynduh noh ia ka jingai Trading Licence ia ki bar jylla bad ban sangeh shi syndon ia ka jingai ai thymmai ia ki Trading License ban khaii pateng bad ban niah kamai kali.
Ha ka dorkhas kaba la aiti sha u Chief Executive Member ka KHADC u Bah Winston Tony Lyngdoh, ka FKJGP kala ong, ba ki samla ka jylla ki dei kiba la lah ban leh ia ki kam khaii pateng ia kaba mynshwa ia kitei ki kam kidei kiba la pyniaid da ki bar jylla.
“Ba ka ophis jong phi kadei ban pynduh noh ia ki Trading Licence kiba la don lypa bad ruh ban sangeh ia ka jingai thymmai ia ki Trading Licence sha ki bar jylla na ka bynta kino kino ki kam khaii pateng kiba la lah ban trei da ki trai jylla, kum ka jingkhaii ia ki mawshun sha Bangladesh, ki dukan die marbam bad kiwei kiwei” la pynpaw ha ka dorkhas.
Kane ka jingdawa kadei ruh na ka bynta ki trok kiba kit mawshun sha Bangladesh bad ki kali Sumo/Taxi kiba iaid na Majai bad Ichamati ban leit sha Shillong.
“Namar mynta ki samla trai ri kane ka thain kila lah ban leh ia kitei ki kam” la ong ka FKJGP.
Da ka jingpyntreikam ia ka Sixth Schedule bad ia ka Trading by Non-Tribal Regulation Act, 1959, ka Federation kala pynpaw ba katkum ka ain donkam ban pynduh noh ia ka lisen, shisien ba ki trai ri trai muluk kila lah ban leh hi ia ki kam khaii.
“Lada ki paitbah trai ri kila lah ban pyniaid hi shakhmat ia ki kam, ka Trading Licence kaba la dep ban ai sha ki bar jylla ym dei ban pynthymmai shuh bad dei ban pynduh noh, khnang ba ki samla trai ri kin lah ban leh ia kitei ki kam bad kan iarap ha kaban shimkhia ia ka jinglong jingman mynta ha kaba iadei bad ka jingkyrduh kam” kala ong.
Ka FKJGP kala dawa ruh ba dei ban tehlakam ia ka jingleh Benami bad ong ba kadei kaba be-ain hapoh jong ka 1959 Act.
“Ngi kyntu jur ia ka ophis ba kan shimkhia halro kane ka mat” la pynpaw ha ka dorkhas.
Kala kynnoh shuh shuh ba ka shnad jongka KHADC kaba dei ban pynshisha ia ki Trading Licence jong ki bar jylla kiba long trai ia ki trok kit mawshun, kam shim la treikam satia kumba la thmu.
“Ngi dawa ba ia baroh kitei ki kali kidei ban don ia ki kot ki sla kum ka Registration Certificates ha ka kyrteng jong ki Khasi” kala ong bad ka dawa ba dei ban khang noh ia kitei ki trok ban kit mawshun lada ki trai kim dei satia ki Khasi.
Haba pyniasoh ia kane ka mat bad ka jinglong ka kolshor, ka Federation kala kam ba ki kyrteng bar ri jong ki shnong bad ka jingdon ia ki Rangbah Shnong ki bym dei ki trai jylla kala plie lad ia kiba nabar ban synshar ia ka thain.
“Ka seng ka kyntu jur ia ka ophis ba kadei ban pynkylla noh mardor ia ki sha ki kyrteng Khasi bad ban pynthikna ba ki Rangbah Shnong kin dei ki trai ri trai muluk” la ong ha ka Dorkhas.
Ka FKJGP kala ong ba ka jingtuklar ka KHADC kan iarap ha kaban kyntiew ia ka jingiaid shaphrnag ha ka thain.
“Ngi ngeit skhem ba ka jingshimkhia thikna halor kine ki mat, kan pynurlong ia ka jingpyrshang ka jong ngi bad ban wanrah ia ka jingkyrmen na ka bynta ka roi ka par ha ka thain baroh kawei” kala ong.
 Sohra Circle hynne ka sngi Baar, kala kyntu ia ka Khasi Hills Autonomous District Council (KHADC) ban pynduh noh ia ka jingai Trading Licence ia ki bar jylla bad ban sangeh shi syndon ia ka jingai ai thymmai ia ki Trading License ban khaii pateng bad ban niah kamai kali.){kind=link}