Shillong, Jymmang 12: Ka Meghalaya ka la ïatreilang bad ka Oxford Policy Management India ban pynlong ïa ka Health Survey ba shisien shisnem jong ka jylla, ka sienjam kaba thmu ban pynkhlaiñ ïa ka jingshakri haka koit ka khiah u paidbah kaba shong nongrim ha ki sakhi bad ban pynbha ïa ka rukom pynbeit ïa ki lad ai jingsumar ha kylleng ka jylla.
Ia ka soskular la iasoi hapdeng ka State Health Systems Resource Centre (SHSRC) Meghalaya bad ka Oxford Policy Management India ha ka jingdon lang u Mission Director ka National Health Mission Meghalaya Ramakrishna Chitturi.
Ka Dr. Valerie Laloo, State Nodal Officer ka SHSRC Meghalaya, ka la soi ïa ka jingïateh na ka bynta ka tnat ka koit ka khiah jong ka jylla, katba u Prabal Vikram Singh, Country Director ka India bad Bangladesh ha ka Oxford Policy Management, u la mihkhmat ïa ka kynhun.
Ka Oxford Policy Management India ka dei ka kynhun ai jingmut shaphang ka roi ka par ha ka pyrthei kaba treilang ryngkat bad ki nongïalam, da kaba ai ïa ka jingtip shaphang ka rukom treikam bad ka jingstad ha ka jingpynkhreh ia ki polisi ban kyrshan ïa ki imlang sahlang kiba duna bad ba pdeng ha ka ïoh ka kot.
Ki heh sorkar ki ong ba ka survey ka thmu ban iaid palat ïa ka jinglum jingkhein kaba ju leh da kaba thaw ïa ka rukom treikam ban ïoh ïa ka jingkhein bniah shaphang ka koit ka khiah jong ki paidbah man la ka po,r kaba lah ban kyrshan ha ka jingshim ia ki rai ha ka polisi treikam bad kyrshan iaka jingpyntreikam ïa ki prokram.
Kane ka sienjam la khmih lynti ban kan iarap ka jylla ban ithuh ïa ki jingeh bad dang mih thymmai ha ka koit ka khiah u paidbah, ban bishar ïa ki jingïapher ha ki district, ban buddien ïa ka jingïaid shaphrang jong ki skhim ka koit ka khiah, bad ban pynkhlain ïa ka jingkitkhlieh ha ka jingai jingshakri ha ka liang ka koit ka khiah.
Ki bor pynïaid ki ong ba kane ka jingleh kan pynmih ïa ki jingkhein jingdiah shaphang ka koit ka khiah kiba man la ka por bad kiba bniah kiba lah ban lam lynti ïa ka jingsam ïa ki song pisa kaba kham ïahap bad ban pynkhlaiñ ïa ka jingshim rai ha ka kam ka koit ka khiah ha Meghalaya.
Ki heh sorkar ki la ban jur ba ki sakhi shaphang ka koit ka khiah kiba long kat kum ki jaka, ki long kiba donkam bha na ka bynta ban pynwandur ïa ki jingpyrshang kiba ïahap bad ki jinglong jingman jong ki imlang sahlang bapher bapher.
Kane ka jingïatreilang ka pyni ïa ka jingkyntur kaba kham ïar jong ka jylla sha ka jingsynshar kaba pynshong nongrim ha ki jingkhein jingdiah bad ki rukom treikam jong ki jaka treikam kiba kyrshan ïa ka jingbuddien bad jingbishar kaba ïai bteng ha ka koit ka khiah u paidbah.
