Khyrwit u samla Mebanlamlynti Masharing ia ka hattrick
Shillong, Jymmang 11: Ka Meghalaya ka la pyni ia ka jinglah ban ialehkai bha napdeng kiwei ki kynhun ha ka Group A jong ka U-20 Men’s National Football Championship 2026 da kaba pynliem ia ka Jharkhand da 5-0 kol ha Narainpur, Chhattisgarh.
Ia ka jingialehkai la pynkynriah naka por mynstep shaka janmiet hynrei kata kam shym la pynthut satia ia ki nongialehkai jong ka Meghalaya.
U Mebanlamlynti Masharing u la thep nyngkong ha ka minit kaba 19 bad ula thep biang haka minit ba 73 bad 87’ ban pyndep ïa ka hat-trick.
U Menangpyndap Khongjee haka minit ba (27’) bad u Damitre Kynjing haka minit ba (67’) ki dei ruh ki nongthep goal jong ka Meghalaya.
Kane ka dei ka jingjop kaba ar jong ka Meghalaya hadien ba ka la pynliem ïa ka Bihar da 3-1.
Ka jingïalehkai kaban wan jong ka Meghalaya kan long pyrshah ïa ka Andhra Pradesh ha 13 tarik ha ka por 4:15 baje janmiet.
