Shillong, Jymmang 11: U Myntri Rangbah ka Jylla Meghalaya, Conrad Sangma, ha ka sngi Nyngkong u la plie paidbah ïa ka karkhana pynmih biochar kaba nyngkong eh jong ka jylla kaba trei daka shnong ha Umsli, Ri Bhoi district, kaba long ka sienjam kaba kongsan ban pynïasoh ïa ka jingialeh pyrshah ïa ka jingkylla ka suiñbneng bad ka kamai kajih ha nongkyndong bad ka rep ka riang kaba neh.
Glad to inaugurate the Biochar Unit at Umsli, Ri Bhoi District.
This first-of-its-kind community-focused carbon removal initiative will convert sustainably harvested bamboo into biochar, a stable carbon-rich material that improves soil health, enhances agricultural… pic.twitter.com/sBcqpKefJg
— Conrad K Sangma (@SangmaConrad) May 11, 2026
Da kaba shim ïa kane kum ka sienjam kaba nyngkong eh ha ka jylla, u Conrad u la ong ba kane ka karkhana kan pynkylla ïa u siej uba la ot ha ka rukom kaba lah ban pynim beit ia u tynrai sha ka biochar — uba long kum u rnga uba la shna da kaba thang ïa ki mar rep kum u siej, ki mar rep kiba la sniew, ki snep dieng lane ki marrep kiba la shu ieh ha ki jaka rep bad tep ha ki thliew ba duna oxygen lyngba ka rukom leh kaba ki khot ka pyrolysis.
Ym kum u rnga uba la ju pyndonkam ban shet ban tiew, u biochar u dei uba ju pyndonkam ban pynsboh ïa ka khyndew bad ban kjit ïa ka carbon. Une u mar uba don kyrhai ka carbon u lah ban pynkiew ïa ka jingpynmih mar rep bad set ia ka carbon ba kan mih da ki spah snem.
U Myntri Rangbah u la ong ba kane ka sienjam ka long kaba don jingmut kyrpang na ka bynta ka Meghalaya, ha kaba ka khyndew kaba bun acid ka ju ktah ïa ka jingpynmih ia ki mar rep mar riang. Kat kum ka jingong jong u, ka jingpyndonkam ïa u biochar kan lah ban pynbha ïa ka jingbat um jong ka khyndew, ban pynioh pat ia ka jingsboh ka khyndew bad ban kyrshan ïa ki rukom rep kiba lah ban neh ha kylleng ka jylla.
Ki heh sorkar ki ong ba ka Umsli Unit ka don ka bor ban weng noh kumba 6,000 metric ton ka carbon dioxide ha ki 20 snem ban wan katba kan pynmih ruh ïa ki lad kamai kiba bun na ka bynta ki paidbah nongkyndong.
U Conrad u la ong ba ka sorkar jylla ka don jingthmu ban buh shuh shuh ïa kiwei pat ki kharkana kum kane ha kylleng ka Meghalaya, da kaba buh ïa ka jylla kum ka nuksa jong ka jingleh pyrshah ïa ka jingkylla suiñbneng kaba mih na ka imlang sahlang ha kaba ka jingneh jong ka mariang kan ai jingmyntoi beit beit sha ki paidbah nongshong shnong.
La khmih lynti ruh ba kane ka sienjam kan pynkhlaiñ ïa ka jingkyntur jong ka Meghalaya sha ki lad jingïada suiñbneng kiba long na ka mariang katba ka kyntiew ïa u siej kum u mar uba neh bad uba jyrngam na ka bynta ka roi ka par ha nongkyndong.
