Jan marshiteng ki rangbah ha Meghalaya ki pyndonkam duma, iap haduh 8000 ngut ha ka shisnem

Shillong, Jymmang 11 : Ka jingpyndonkam duma kala poi ha u pud ka jingma ha Meghalaya, ha kaba mar shiteng na ki briew bala rangbah naduh 15 snem shaneng kila pyndonkam ia u duma (dih bad bam) bad jan kot 8000 ngut ki briew ki iap ha ka shisnem na ki jingpang ba ioh na u duma, ong ka State Nodal Officer ka National Tobacco Control Programme Dr Nabaneeta D Mawrie.

Haba kren ha ka jingplie ia ka World No Tobacco Day 2026 campaign ha ka sngi Nyngkong, ka Dr Mawrie kala ong ba kane ka jinglong jingman ka dei ka jingkhuslai kaba khraw ia ka koit ka khiah u paidbah bad ong ba ka donkam kyrkieh ban shim ia ki sienjam ban iada ia ki samla ka Jylla bad ki paidbah.

“U duma um dei tang ka jingmlien, u dei ka jingriew kaba la shna thikna ban pynngop ia ki samla jong ngi bad ki paid nongshongshnong” kala ong.

“Da jan mar shiteng ki rangbah naduh 15 snem shaneng ha Meghalaya ki pyndonkam ia u duma, jan kot 8000 ki jingim kiba duh noh manla u snem namar ka jingpang ba iadei bad u duma, ka jingkyrkieh ban leh eiei mynta ka long kaba jur bha”.

Ia ka WNTD’26 campain la pynsdang hapoh ka phang “Duma! Ka Jingkhaïi jong ka JINGÏAP,” kaba ïadei bad ka phang jong ka pyrthei baroh kawei “Unmasking the appeal, countering nicotine and tobacco addiction.”

Kane ka jingialap aba sdang ha ka 6 tarik Iaiong, kan iaid ha ki skul bad ki college ha baroh kawei ka Jylla ha baroh shilynter u bnai Iaiong bad Jymmang, bad kan kut ha ka 31 tarik Jymmang.

Dr. Mawrie ka la ong ba ka thong jong kane ka jingïalap ka long ban pynkhih ïa ki jaka pule ba kin ïalam ïa ki jingïaid paidbah, ki jingsoi kyrteng, bad ban leit sha ki paidbah ha ki shnong ki thaw ban ïeng pyrshah ïa ki rukom treikam jong ki kompani duma bad ban pynshlur ïa ki samla pule ban jied ïa kaba bha bad kaba tei.

“Kane ka campaign ka thmu ban pynpaw pyrthei ïa ki rukom treikam kiba buh jingma jong ki karkhana duma, ban pynshlur ïa ki samla pule ba kin shim ïa ki rai kiba don jingtip bad kiba tei, bad ban pynkylla ïa ka jingïoh jingtip sha ki kam kiba don jingmut ha ka imlang sahlang,” ka la ong.

Ka la kdew ruh sha ka jingïaid shakhmat ka prokram hapoh ka Tobacco Free Educational Institutions, kaba la pyntreikam ryngkat bad ka Sambandh Health Foundation. Ha ki saw snem ba la leit, palat 9,000 tylli ki skul bad kumba 6 lak ngut ki khynnah pule ha Meghalaya ki la ïashim bynta ha ki jingpynshai paidbah halor ki jingsniew jong u duma.

Ka heh na ka Tnat Pule Puthi, Jennyfer J Synrem, ka la ong ba ka jingbun jong ki nongïashim bynta ha u snem ba la leit ka pyni ba ka bor sngewthuh ka dang kiew.

“Ha u 2026, ngim dei tang ban bteng ïa ka campaign; ngi dang tei ïa ka jingkhih lang,” ka la ong. “Ki skul kim dei tang ki jaka ban ïoh jinghikai hynrei ki long ki nongwanrah ia ka jingkylla.

a Deputy Commissioner jong ka South West Garo Hills, Anendya Raajsshre, IAS, ka la ong ba ka jingtrei shitom kaba neh ka long kaba donkam.

“Ka jingkylla kaba shisha kan wan ynda ka jingïoh jingtip ka kylla sha ka jingleh ia ka kam,” ka la ong. “Ki jingthmu kum ka WNTD bad ToFEI kim dei tang ki dampaign, ki dei ki jingkular ban ïada ïa ki mynsiem briew.

”La khmih lynti ba kane ka campaign kan ïoh ia ka jingïashim bynta na ki skul, kolej, ki tnat sorkar, ki seng bhalang, bad ki kynhun ha ki shnong hashwa ka sngi rakhe ia ka World No Tobacco Day ha ka 31 tarik Jymmang.