Shillong, Jymmang 10 : Ka Iingkashari Meghalaya High Court kala bthah ia ka Sorkar Jylla ba kan aiti ia ka affidavit hapoh ka lai taiew halor ka jingiaid ki case droks bala mudui ha ki saw tylli ki Police Station ha ri-lum Garo bad ka jingiaid pahara ki Pulit ha ki jaka ba jur ka jingkhaii droks.
Kane ka jingbthah kala mih ha ka 7 tarik Jymang na ka Iingkashari Division Bench ba kynthup ia ka Chief Justice Revati Mohite Dere bad Justice W Diengdoh haba shong bishar ia ka PIL bala mudui da u Mewaker Lyngdoh.
Hadien ka hukum ka Iingkashari ba 7 tarik Iaiong, ki shipai Border Security Force (BSF), Narcotics Control Bureau (NCB) bad Custom, kila aiti ia ka affidavit ha ka 6 tarik Jymmang ba pyni ia ki lad pyrrkhing bad ki jingkurup.
Ha ka affidavit, ki BSF kila pyntip ba kila kurup ia ki jingdih buaid ha ki phra tylli ki jingjia hapdeng ka 19 tarik Kyllalyngkot 2025 bad 28 tarik Rymphang 2026.
“Ki bor shipai BSF kila register case bad ka Dalu Police Station, Gasuapara Police Station, Mahendraganj Police Station bad Purakhasia Police Station” ong ka hukum.
Ia u droks bala kurup la aiti sha kine ki Police Station hadien bala dep ujor ia ka ejahar.
Ka Iingkashari ka pynpaw ba u Additional Senior Government Advocate ula pan por ban ioh ia ki jingbthah halor “kaei kaba la long la man ia kine kicase bala register ha kine ki Police Station, kaei kaba jia ia u droks bala kurup bad aiti da ki BSF bad kiei I sienjam bala shim ban pynjot pynjulor ia u”.
Ka affidavit ka NCV ka pynpaw ba kala register ia kawei ka case beit beit ba iadei bad ka Meghalaya naduh ka 1 tarik Kyllalyngkot 2025 da ka jingioh kurup haduh 1.957 kilogram u dawai kuli Methamphetamine.
“Ka jingtohkit ia kane ka case ka pyni ia ka jingkhaii ia une u jingdih buaid na Silchar ha Assam shaphang ka Mawsynram ha Meghalaya bad ruh sha ki jaka khappud” ong ka hukum.
“Une u drok u shongdor haduh T.1.56 klur. Ka NCB kala pynpaw ruh ia hynriew tylli ki jingkurup ha Barak Valley, Assam, ka jaka kaba la khein kum kaba don marjan ka Jylla Meghalaya bad ka jaka kaba pyniaid lynti ia u droks, kaba ktah pat ia ka Jylla”. Kine ki jingkurup ia u methamphetamine bad heroin ki shongdor da ki klur tyngka.
Ban pynkhlain ia ka jingiatreilang, ka NCB ka pyntip ba kala buh ia ka North Eastern Regional Office hapoh ka jingkhmih u Deputy Director General (NER) ha Guwahati.
“La buh ruh ia ki Field Office ha Aizawl bad Dimapur ha u 2025, khamtam haba khmih ia ka jingkhapp droks na shillong u pud lyngba ka khappud Myanmar” ong ka affidavit.
La bynrap ba la thaw ruh ia ka Anti-Narcotics Task Force ha Meghalaya ha u 2023 bad ka jingbuh ia ka ANTF Police Station ba kyrpang ha u snem 2025 na ka bynta ki kam ban tohkit ia ki case hapoh ka NDPS Act.
Ka Sorkar India kala ai T.83.50 lak sha ka Jylla hapoh ka Assistance to States/Union Territories Scheme for Narcotic Control.
Ka Tnad Custom kala pyntip ba 36 tylli ki Preventive Unit hapoh ki phra tylli ki Division kila pynlong ia ki jingkhynra droks hapdeng u snem 2023 bad 2026 bad kila register haduh 9 tylli ki case heroin ha u 2023-24, phra tylli ha u 2024-25 bad shiphew tylli ha u 2025-26.
Ka jingkurup ia u ganja ka kot sha ka khyndai, hynniew bad khatsaw ha kine ki juh ki snem. Ka jingkurup ia kiwei pat ki jingdih, kynthup u Yaba Tablet bad brown sigar kala kiew na ki khyndai tylli ki case ha u 2023-24 sha ka khathynniew tylli ha u 2025-26.
Ka Iingkashari kala bthah ia ka Jylla ba kan file ia ka affidavit bad ban ai lypa ia ka copy sha u nongiasaid jong u nongmudui. Ia kane ka PIL yn sa shong bishar biang ha ka 8 tarik Jylliew, 2026.
