Ka tamasa Niangtaser | Balei ki khot ka ‘Niang ‘Worldcup’ – kumno ka im bad kumno ka kylla

Nongpoh, Jymmang 08 : Ka tamasa Niangtaser kaba ju iakhot ruh kum ka “Niang Worldcup”, kala sdang ha ka sngi Thohdieng ha Iewsier, Ri-Bhoi District.

Ia kane ka tamasa kaban neh arsngi, la pynlong da ka Ri Bhoi Tourism Environmental & Development Forum ha ka jingiatreilang bad ka Dorbar Shnong Saiden.

Ha kane ka tamasa kan don ruh ki ki jingpyrngia bapher bapher naduh ka jingialehkai football, ka jingpyrngia lyngba ki sur tynrai, ka jingiasah miet ha kaba ki nongiashimbynta kin ioh ia ka lad ban leit tam ne jied ia ki Niangtaser ha ka por mynmiet, ka jingiakop khwai dohkha bad kiwei kiwei.

Kane ka tamasa Niangtaser kala sdang nyngkong eh ha u snem 2010 ha ka jinglong Rangbah Shnong u Bah EK Lapang (Bam Kwai ha Dwar U Blei) bad naduh katei ka snem, ka Dorbar Shnong ha ryngkat ka Seng Samla bad Seng Longkmie, ki ju pynlong ia kane ka tamasa shisien man ka saw snem.

Lah ban kdew hangne, ka Niangtaser ka dei ka khniang ba iasyriem kum ka niangkongwieng, kaba mih tang shisien ha ka saw snem. Ka dei ka khniang kaba mih tang ha ka por mynmiet ha ki khlaw kiba rben, kaba ju mih ha u bnai Iaiong bad Jymmang.
Kaba phylla ka long ba kane ka khniang ka ju mih tang ha ka thain Ri-Bhoi District hapoh ka Jylla.

Balei ki khot ia ka Niangtaser kum ka Niang Worldcup – ka daw ka long ba kane ka khniang ka mih tang ha u snem ba ju don ka lympung ialehkai phutbol ba hehduh ka pyrthei-ka World Cup.

Byllien ki paidbah ki ju leit tam ia kane ka khniang tang ha ka por ba ki sdang mih kata hapdeng u Iaiong bad ka taiew ba-ar, ne ba-lai jong u Jymmang bad tang mar syn kem, ki nongkem ki hap ban pyniap mardor da kaba kdiah ia ka khlieh bad shim tang ia ka met kaba khlein hur hur lem kumta, kane ka khniang ka lah ban kylla sop bad ym long shuh ban bam.

Shuwa ba kan kut ka por mih, lada dei hajan jong ki wah, kane ka khniang ka ju pynkut pat iala ka jingim da kaba leit noh sha um bad ki jaka ba ka ju noh ka dei ruh ha ki turthup ne ki lad lad bah. Dei ruh ha kum kane ka por ba ki dohkha-ka Khasaw bad Khalad ki muja bad ki nongkhwai ne rawon ki ju iabeh ban pynnoh khwai da kane ka khniang.

Ka Niangtaser ka dei kaba rem dor bha bad dei namar kane ka daw, ki paid na Ri-Bhoi ki ju iabeh ban ialeit wad Niangtaser ha kum kine ki por.

Haba kylli kai na ki iew ha Ri-Bhoi, ka Niangtaser ka shongdor haduh T.1000 shikilo ha ka por ba dang mih nyngkong bad dang duna ki nongtam hynrei katba nang iaid ki sngi bad nang bun ki nongtam, ka dor kala kham hiar bad poi sha ka T.500 ruh.

Ia kane ka tamasa la plie da u Myntri Sorkar Bah Sosthenes Sohtun ha ka jingiadonlang u MLA ka Umsning Dr Celestine Lyngdoh, u Rangbah Shnong ka Saiden Bah EJ Myrthong, u Chairman ka RBTE&DF Bah Plielad Tiewsoh nalor ka jingdon lang ki khynnah skul bad ki riew paidbah kiba la wan na kylleng ki jaka.

Haba ai jingkren u Bah Sosthenes Sohtun u la ai ka jingiaroh ia ka kynhun RBTE&DF lem bad ka Dorbar Shnong ban pynlong ia kum kane ka tamasa kum shibynta ban ia kmenlang bad ki paidbah nongshong shnong halor ka jingmih jong kine ki khniang kiba kham pher hapoh ka district ban pynithuh sha ka pyrthei halor ka jingwan ne ka jingmih jong kane ka khniang shisien ha ka sawsnem.

U la ong ruh, ba kum ka jylla ka la don shibun ki tamasa, hynrei haba ia dei bad kane ka tamasa Niangtaser ka long kaba kham pher namar la pynlong ia ka shisien ha ka sawsnem bad kata ha ka aiom ba baroh ki paidbah ha ka pyrthei ki ju ap khmieh lynti ban sakhi ia ka jingialehkai football World Cup. Kum kine ki tamasa kin nang pynpaw nam ia ka Jylla ha ka kam jngohkai.