Shillong, Jymmang 08 : Ka kynhun ialehkai ka Mishon SSCC ka la lah ban buh iala ka jaka ha ka pre-quarterfinal ka lympung 5th Meghalaya State League da ka jinglah ban pynliem ia ka Umlakro SC da 5-2 kol, ha ka jingiakhun ka Group F kaba la long ha Mairang hynne ka sngi Thohdieng.
Ha kawei pat ka jingiakhun kaba dei jong ka Group E ha Wahiajer, ka Shillong Lajong FC ka la lah ban pynliem da 5-0 ia ka Lumphyrnai Sohphoh.
Haba phai biang sha ka jingiakhun ba la long ha Mairang, na ka liang ka Umlakro SC ka donkam bha ba kan khur ia ka nam jop kaba heh khnang ba kan lah ban bat ia ka kyrdan kaba ar, ia kaba ia kane ka jingthmu ka jong ka, la lah ban khanglad noh pat ia ka hadien ba ka kynhun ialehkai ka Mishon tad haduh ba kut shwa jong ka kylla step, ka la lah ba kan ioh ba kan thep haduh lai tylli ki kol kiba la wan lyngba u Rekybart Ryntathiang (18′), Lawanphrang Kurbah (26′) bad Banshimborlang Ryntathiang (29′).
Haba wan ban bteng ia ka kylla miet, ka kynhun ialehkai ka Umlakro SC ka la ioh ia ka kabu ba kan pynphai ia ki artylli ki kol ki jong ka lyngba u Mebadonbor Shangpliang (62′) bad Adonydevy Riwan (80′), katba naka liang ka Mishon ia ki kol kiba dang sah ki jong ka pat la thep da u Lawanphrang L Mawnai (66′) bad Stevenmark L Kynshi (82′).
Katba ha ka jingiakhun hapoh Wahiajer pat ki kol lyngba u Colinsalmon Lyngdoh (59′, 82′, 87′), Badondor Marbaniang (51′) bad Donboklang Kharjana (80′), ka la biang pura ia ka Shillong Lajong FC ban jop ia kane ka jingiakhun bad kaba la pynlong pat ia kine ki ar kynhun ba kin pynskhem ialade ban bat ia ka kyran kaba nyngkong bad kaba ar napoh kane ka group.
Ha ka jingiakhun ia ka pre quarter, ka Lajong kan mih madan ban iakhun pyrshah ia ka Mishon katba ka Lumphyrnai kan iakhun pyrshah ia ka Langsning FC.
