Shillong, Jymmang 08 : U National Vice President ka NPP bad Symbud Myntri Rangbah Bah Sniawbhalang Dhar ha ka sngi Thohdieng ula theh lut ia ka jingkyrshan ha lyndet u Dr DRL Nonglait na ka bynta ka elekshon shiteng samoi ka Shillong Lok Sabha, bad ong ba ka party kan aiti lut ban pynthikna ba un jop bad ba kan nym don kano kano ka jingpyrshah na u paidbah.
“Mynnin ngi la pynbna paidbah ia u kyrtong jong ngi u ban aireng ha ka elekshon shiteng samoi ka Shillong Lok Sabha bad ngin iatrei shitom bha ban pynjop ia u” ong u Bah Dhar haba iakren bad ki nongthoh khubor.
“Nga kyrpad ia phi ruh bap him iarap lem ia ngi ban lah pynjop ia u”.
Haba kren halor ka jingkylli ka jingthep vote pyrshah ki paidbah (anti-incumbency) ia ka NPP, u Bah Dhar ula ong ba ka party kala pynleit jingmut ia ki kam kiba dei ban leh nangne shakhmat.
“Ngam tip la kan don ne em. To ngin peit, namar ngi hap ban trei shitom ban lah pynjop ia u. Kane ka dei ka jingkut jingmut na ka liang ka party” ula ong.
Ula batai ia u Dr Nonglait kum u briew u bym pat don ka jingthohbria ha ki kam sain pyrthei.
“Nalor kane, hooid, phi la iohsngew ia ki jingkren jong u. U dei uba shisha. Ula batai ia ki daw balei ba u rung sha ka jylli sain pyrthei. Naba u dei u dur thymmai bad u kyrtong thymmai, nga tharai kan nym don kano kano ka jingpyrshah ia u shimet” ong u Bah Dhar.
“Kada ka don kano kano ka jingduna hangne hangtai na ka party, nga tharai ngin lah ban leh eiei ia ka” ula ong.
Haba kylli, u bah Dhar ula iathuh ba ka NPP ka don jingthmu ban ioh ia ka jingbun paid kaba bun eh ha ka elekshon Assembly ban wan.
“Ha u 2028, nga tharai ngin lah ban jop bun paid eh ban thaw Sorkar marwei. Balei nga ong kumta ka long namar shibun ki kam kila iaid ha kylleng ka Jylla katba nga dang kren” ula ong.
“Khlem pep, ka jingiakhun kan don hynrei ngi hap ban pynthikna ba ngin ioh ia u nombor” ula ong.
Haba kylli halor ka VPP bad kiwei ki seng sain pyrthei ba don ha liang pyrshah, u Bah Dhar ula ong ba ka NPP ka pdiang ia ki jingtynjuh.
“Ym don jingeh. Ka VPP ka don, ka Congress ka don, ka UDP ka con,ka NPP ka don, bad ki paidbah kila sakhi ia shibun ki kam kiba la pyntrei ha kine ki phra snem” ula ong bad bynrap “Ki paidbah ka Jylla ki tip shano ban vote bad iano ban vote”.
