Kwah ka KHADC ban pynlong da ka elekshon Syiem ka Hima Sohra | Kyntait ai sanat ia u Bah Marremdor Syiem

Shillong, Jymmang 08 : Ka Khasi Hills Autonomous District Council (KHADC) kala pynpaw ba ka daw ba kam ai sanat ia u Bah Marremdor Syiem kum u Syiem thymmai ka Hima Sohra bad thung da u Acting Syiem ia mynta shipor, ka dei namar ba ka kwah ban pynlong da ka elekshon jied Syiem ba pura.

Ia kane la iathuh da ki nongialam ka Hima Sohra, hadien ka jingiakynduh ia u Chief Executive Member (CEM) ka Council ha ka janmiet sngi Palei hadien ka jingiatur paidbah ki khun ki raiot ka Hima ban dawai ai sanat noh ia u Bah Marremdor Syiem, uba la Dorbar Hima kala jied naduh ka 3 tarik Naiwieng 2025 hadien ka jingkhlad noh u Paiem Freeman Sing Syiem.

Uwei na ki nongialam Bah Wellborn Bynnud ula iathuh ba ka KHADC ka kwah ban pynlong da ka elekshon jied syiem namar ka jingmih sa uwei u briew na ka kur Syiem uba kwah ban long Syiem ka Hima Sohra. U iathuh ba une u briew u dei u Bah P Syiem.

U Bah Wellborn ula kynnoh “Uta u Bah P Syiem (uba ngim ithuh), um dei satia na ka Hima Sohra hynrei u dei uba shong ba sah ha Mairang bad um don wat tang ka iing sad iing sunon ha Sohra. Ngim tip kaei kata ka Syiem Kynthei kaba sei Syiem ia u bad ngim tip ruh kiei kita ki Myntri kiba kyrshan ia u”.

U ong ba ka KHADC kala iai pynmih ia ka kyrteng u Bah P Syiem bad pynpaw ba kum ka Council kan hap ban ai ia ka jingbishar kaba hok ia une u briew.

“Ia u bah Marremdor Syiem la wanrah da ki Myntri sha ka Executive Committee ka Hima bad ha ka 3 tarik Naiwieng, kala khot ia ka Dorbar Bah ka Hima ban pynskhem ia u Bah Marremdor namar ka jingbym don mano manor uh ba kwah ban iakhun ia ka khet Syiem. Dei namar kane ba ka Dorbar Hima kala pynskhem ia u Bah Marremdor ban long u Syiem” ula ong.

“Hynriew bnai ka por kala ai ba ngi la aiti ia ki kot ki sla sha ka KHADC ba kan ai sanat hynrei ki borkhmih kila leh bym patiaw bad pynpaw kumba kim moh ban ai sanat..kane kala pynlong ia ngi ki khun ki hajar ka hima ban bitar bad ban wan tur paidbah sha ka Council mynta ka sngi” ula bynrap.

U Nongaibuit ka Hima bad Syiem barim ka Hima Mylliem Bah Laborious Syiem ula ong “Ngi la pynshai kdar ia ki ba ha ka Dorbar Iing la jied ia u Kni da ka kpoh iing, ha ka Dorbar Kur la jied ia u Rangbah Kur da ka Kur, ha ki Shnong ka dei ka hok kat kum ka riti dustur ba la jied ia u Rangbah Shnong, u Tynmen Shnong ne u Sordar Shnong da ka Shnong bad ia u Suiem la jied kat kum ka hok ka riti tang kita kiba don hok ban jied. Ka jingjied ia u Suiem Sohra la jied bad pyndep kat kum ka riti dustur bad la wanrah ruh ha ka Dorbar Hima bad kaba kongsan eh ka long bala pyndep ruh ia ka jingleh niam leh rukom. Kaba sah ka dei tang ka jingai sanad ka KHADC”.

U Bah Laborious ula kyntu ia ka Executive Committee ka KHADC ba kam dei ban wanrah ia ki kam party politics namar kane kan pyniap ia ka riti ka dustur u Khasi bad ka kamram jong ka District Council ka long ban peit ban iada ia ka riti dustur, ym ban thaw ain da kawei pat.

Haba kylli kaei kaba ka Hima kan leh mynta namar kam shim la ioh ia ka jingdawa, ki nongsynshar kila ong, ba mynta kin leit ban pynsngew ia kaei kaba mih na kane ka jingialang bad ka District Council sha ki khun ki hajar bad kin sa shong pyrkhat ha ka Dorbar ia kiei ki sienjam nangne shakhmat.

U CEM ka KHADC ula ong, “Ka jingkwah jongki kadei ka long ban pynbor ia ngi ka District Council ban ai noh ia ka Sanat ia u Syiem Marremdor kaba kila kam ba kila jied ha ka rukom kaba beit bad ha ka riti ka dustur. Ngi lah iohsngew ruh ia ka jingeh kaba kila pynsngew sha ngi bad na ka liang ki Executive Member (EM) ka tnad Elaka bad Land kila pynshai ia kiba bun kiei kiei baroh bad khatduh hi ngi lah sngewthuh ba ka jingkwah ka jongki hi kadei ba ki kwah ba ngin ai sanad beit noh mynta ka sngi.”

“Na ka liang ka jong ngi, kam long kaba suk ba ngin shu ai sanad beit noh mynta ka sngi bad ngi lah ong ia ki ba ngin shim por sa katto katne ba ngin ia ioh ban peit kham bniah shuh shuh ia kane ka kam kaba iadei bad ka hima sima Sohra bad ngi khlem buh por ruh ia ki lano ngin ai ia kata ka sanad” ula ong.

U EM Elaka u Bah Denzil Chyne ula ong, “Ka daw kaba nyngkong hi kaba ngi lah pynpaw kadei ka jingwan mih jong uwei u briew uba dei na ka Kur jongki hi uba lah ban ieng Syiem bad kwah ban ialeh ia ka elekshon Syiem bad u don hok ruh bad u lah pyni ia ki kot ki sla ia ka jingdon jingiadei bad ka Kur jong u Syiem.

“Lada don ar ngut kan hap ban long da ka elekshon bad kumta ka Dorbar Hima ka hap ban pynkhreh namar ka Hima Sohra ka don 41 ngut ki Elector bad 12 ngut ki Myntri. Na kine ki Elector bun na ki ruh kidei kiba la khlad ne don kiba lah pang, kumta, ki hap ban don biang ia ka Re-Election ne ka jingjied biang hapdeng ka shnong ne ka raid ban jied ia uta u Elector. Ha ka liang ki Myntri ruh ki don sa tang 9 ngut bad 3 ngut ki Myntri na ka Kur Shrieh, Khongwir bad Mawdkhap kin hap ban wan da kiba thymmai”.

“Ngi lah ong ia u Acting Syiem ba un leh ia ka kam bad ban wanrah ia ka kaiphod bad ynda lah biang lut ki Elector yn sa pynlong ia ka elekshon. Kam dei ba ngi khlem ai sanad ia ki, na kano kano ka daw. Ka jingbat ia ka sanad ka long ba katkum ka rukom leh hi, lada don 2 ngut kiba iakhun bad kiba don hok ban iakhun, ia ka shuki jong u Syiem Sohra yn hap ban pynlong da ka elekshon bad ki kyndon ain jong ka Council ruh kila batai shai ban hap ban khot thep kyrteng ba kan don ka elekshon” ong u EM uba khmih ia ka Elaka.

U EM Bah Powell Sohkhlet ula ong, ba ka KHADC kala thung hi da u Myntri kum u Acting Chief ka Hima Sohra bad hapoh jongu ki don baroh ki Myntri kiba dang shait dang khlain bad ki don ruh ki dkhot jong ka Executive Committee kiba pyniaid ia ki kam ki jam jong ka Hima.