Guwahati, Jymmang 8: Ki jingia paiat iapra mynta ka la sdang ban paw pyrthei mynta hapoh ka kynhun synrop jong ka Liang Pyrshah hadien ka jingshah rem ha ka elekshon ha kaba u nongïalam ka Raijor Dal u Akhil Gogoi u la kynthoh ïa ka Congress ba la ïalam ha ka Liang Pyrshah ba kam don ka buit ban ïakhun pyrshah ïa ka BJP.
U Gogoi u dei uwei na ki 21 ngut ha ka kynhun jong ka Liang Pyrshah kiba la jop ha ka election kaba dang shu dep shen.Ka Raijor Dal ka la ioh ia ka jingjop ha ki ar tylli na ki 13 tylli ki jaka ba ka iakhun, katba ka Congress ka la jop 19 tylli na ki 100 tylli ki constituency ba ka la pynieng kyrtong.
Ka Assam Jatiya Parishad (AJP) kaba la ïalam da u Lurinjyoti Gogoi, ka la mad ïa ka jingbymlah jong ka ban leh bha ha ka election sha ka Ïing dorbar thaw ain ha Assam.Katei ka seng kaba la iakhun elekshon naduh u snem 2021, kam shym la lah ban jop wat tang kawei ka constituency ruh.
Haba kren sha ki lad pathai khubor, u Akhil Gogoi u la ong, “Ka BJP ka la don ïa ka plan kaba best bha bad, ha kaba kut jong ngi, kam shym la don ki jingthmu ne ki plan hynrei kaba shu jia ryngkhat.Kata ka dei ka daw kaba kongsan.Ki lah ban don kiwei pat ki daw,ki lah ban don ki daw ha kaba iadei bad ki kor EVM, hynrei nga pyrkhat ba ka BJP kala thaw ia ki lad ki lynti bad ki buit trei kam ban jop ha kane ka election bad ngim shym la lah satia ban don ia ki buit trei kam namar ba bunsien ka por ka la iaid ha kaba pynlong ia ki jingialang halor ka jingiatrei lang, ka la iai bteng ban pynslem ne bym phikir.”
U Gogoi u la ong ba ka BJP ka la pyntrei kam ia ki buit kiba bun jait ha kine ki snem kiba la leit.
“Ka buit trei kam kaba khraw tam jong ka BJP ka long ka delimitation bad ka Special Revision ïa ki thup ki nongthep vote.Hadien ka delimitation, ki la pynduna ïa ka jingdon jong ki seat kiba bun ki Muslim sha ka 22 tylli.Kiba bun kila pynkylla noh sha ki constituency kiba bun ki Hindu bad ha kine ki san snem ki iai bteng ban kren halor ka Hindu-Muslim.Kila pynlong ruh ia ka jingbeh shnong bad ka jingpynkynriah bad kila kren bad pyrta ruh halor ki Bangladesh ‘Miya Miya’ bad ‘Pakistan Pakistan’, bad la thmu ban beh shnong kum ka lad kaba khatduh ban pyniada ïa ki paidbah Assam. Ngim shym la don kano kano ka buit ban pyrshah ïa kane,” u la ong.
