Shillong, Nailar 21 : Ki petrol pump ha kylleng ka sor Shillong kila sakhi ia ka jingkhapngiah bad ka jingieng lain kiba jrong jong ki kali ha ka janmiet sngi Thohdieng namar ka khubor hamsaia ba ka umphniang kala duna namar ka jingthut ha ka jingpynpoi umphniang sha Meghalaya.
Kane ka jingialeit tur ki trai kali sha petrol pump kala wan jia namar ka jingpakhang ia ka surok highway Shillong-Guwahati kaba la iaid mynta la arsngi, da ka jingmih ki kynhun na Assam kiba khang ia ka jingwan rung ki kali kit mar bad ki kali kit briew sha Meghalaya.
Ka jingsheptieng u paidbah kala nang jur da ka jingsaphriang jong ki khubor ha ki rynsan social media ba kam ba ka seng Petroleum Mazdoor Union kala rai ban sangeh ia ka jingwan kit umphniang kali sha Meghalaya.
Ha ka janmiet sngi Thohdieng, ki kali kila leit ieng lain ban theh umphniang lupa ha man ki petrol pump kiba don ha kylleng ka sor Shillong. Ha ki katto katne ki jaka, la shem ruh ba ka jingieng lain ki kali kala poi shaduh ka surok iaid kali kaba la wanrah ia ka jingdheng kali.
