Guwahati, Nailur 29 : U Myntri sorkar ka Assam u Pijush Hazarika hynnin ka sngi Balang ula pynmih ia ka jingkynthoh kaba tyngeh pyrshah ia ka seng Popular Front of India (PFI). Haba pynpaw halor ka jingshah khang pyrshah jong kane ka kynhun PFI ha ka sorkar pdeng, na ka liang une u myntri ka Assam ula pynpaw sha ki lad pathai khubor da kaba ong baroh ki dkhot jong ka PFI ki dei ki lehnoh jihadi.
Nalor kata ula ong ruh ba la seng nongrim ia ka PFI lyngba ki kynhun ki ba don dak sniew, kata hadien ka jingkhang pyrshah ia ki kynhun seng Islamic kum ka Students’ Islamic Movement of India (SIMI) bad ka Indian Mujahideen (IM).
Nalor kata une u Myntri ka sorkar Assam uba dei ruh u nongialam ba la rim ka BJP, u Pijush Hazarika ula ong ruh ba ia kane ka kynhun Popular Front of India (PFI) dei ban khang pyrshah shi junom.
“Nga la ju iai ban na ka bynta ban khangdam shisyndon ia kane ka kynhun PFI,” ong shuh shuh u Pijush Hazarika uba la bynrap ruh ba dei ban khangdam shi junom ia ka PFI ym tang na ka bynta san snem.
Ha kawei pat ka bynta, na ka liang u Myntri rangbah (CM) ka Assam, u Himanta Biswa Sarma ruh ula pdiang sngewbha ha kaba iadei bad kane ka jingkhang pyrshah jong ka sorkar pdeng pyrshah ia kane ka kynhun seng PFI.
Ka sorkar pdeng kala pynbna ia kane ka rai khang pyrshah ia katei ka kynhun PFI lem bad ki kynhun kiba pyniasoh bad ka na ka bynta san snem kynthih.
Na ka ling u CM ka Assam ula pynpaw lyngba ka twitter da kaba ong; “Nga pdiang sngewbha halor kane ka jingkhang pyrshah ia ka kynhun (Popular Front of India) PFI da ka sorkar India.Na ka liang ka sorkar ka ieng pyrshah halor kino kino ki kynhun kiba pyrshang ban wanrah ia ka jingiapait iapra, ki jingiasylla ban pynthut ia ka suk ka sain pyrshah ia ka ri India bad ba dei ban shim da ki sienjam kiba tyngeh.Ka India hapoh ka jingialam jong u PM Narendra Modi ka dei ka sorkar kaba shlur bad kaba skhem.
Ka sorkar pdeng kala khang pyrshah ia kane ka kynhun seng PFI da kaba pynbna kum ka kynhun seng kaba beain hapoh ki kyndon ain Unlawful Activities (Prevention) Act (UAPA).
Ia kane ka jingshim rai la pynlong ruh hadien kiba bun tylli ki jingkhynra hapoh ka ri bad hadien ka jingioh kem ia kumba 240 ngut ki briew kiba don bynta bad ka PFI.
Nalor ka jingpynbna kum ka kynhun seng kaba beain, ka sorkar pdeng kala ong ruh ba ka PFI ka dei kaba don bynta bad ka kynhun seng Students Islamic Movement of India (SIMI), ka Jamat-ul-Mujahideen Bangladesh (JMB) kumjuh bad ka kynhun seng lehnoh Islamic State of Iraq and Syria (ISIS).
Nalor kata katei ka jingpynbna jong ka sorkar pdeng kala pynpaw ruh ba ka PFI ka don bynta ruh ha ki kam bymman kiba buh jingma ia ka shongsuk shongshngain jong ka ri.
Shuh shuh katei ka jingpynbna kala ong ruh ba ka PFI lem bad ki kynhun kiba ia don bynta lang ki dei kiba treikam ha kaba paw kum ha ki kam bhalang, ha ka pule puthi, ha ki kam sain hima sima, hynrei ki don pat ia ki jingtreikam ba buhrieh kiba long ka jingma ia ka ri hi baroh kawei.
