Guwahati, Nailur 29 : U MP ka Congress na Assam, u Abdul Khaleque ula pynpaw ka jingkyrshan ia ka Priyanka Gandhi Vadra ba kan shimti kum ka president ba hakhliehduh jong ka party Congress.
Une u MP ka Congress na Assam ula ong ba kum ka pyrsa kurim na ka longiing ki Vadra, ka Priyanka Gandhi Vadra kam dei shuh ka dkhot jong ka longiing ki Gandhi.
“Namar ka jingkyntait ia u Rahul Gandhi ban long biang u nongialam ka INC sa shisien pat, Nga aijingmut bad iahap ia ka Priyanka Gandhi kum ka kyrtong kaba biang tam.Kum ka pyrsa kurim jong ka longiing ki Vadra, ka Priyanka kam dei shuh ka dkhot jong ka longiing ki Gandhi katkum ka kolshor jong ka ri India,” pynpaw u MP ka Congress u Abdul Khaleque lyngba ka Twitter.
Ka jingialeh na ka bynta ban ioh bat ia katei ka kam (post) kaba hakhliehduh kala iaid kyllain bha hapoh Rajasthan.
Ka party liang pyrshah Congress ba kongsan hapoh ka ri ka lah ban jied ia u/ka president bathymmai na shabar ka longiing jong ki Nehru-Gandhi ha ka sien kaba nyngkong eh hadien jan kumba 25 snem mynta.
Ka longiing Gandhi kaba kham noh sha u Ashok Gehlot uba dei u myntri rangbah ka Rajasthan, bad u Shashi Tharoor uba dei u nongthaw ain na ka jylla ka thain shathie jong ka ri na Kerala bad uba dei ruh u heh barim ka UN ki lah ban pyndep ia ka jingthep kyrteng mynta ka taiew.
